Gabinete Mike Eman II a entrega su retiro na gobernador di Aruba ayera. Esaki ta e procedura normal den cuadro di eleccion.
Ayera atardi Gabinete di Gobernador di Aruba a tene un conferencia di prensa unda a informa riba e retiro aki y e procedura di nombramento di un gabinete nobo. Rajen Budhu Lall, director di e Gabinete di Gobernador ta clarifica cu te ora cu resultado di eleccion no sali, e gobierno no lo drenta den estado demisionario.
Siguientemente sr. Budhu Lall ta comunica cu gobernador Alfonso Boekhoudt lo eherce su derecho di voto na St. Anna School pa 10or y mey.
Procedura pa formacion di un gabinete nobo
Sr. Budhu Lall ta splica cu ora e Gabinete di Gobernador haya e retiro oficial di e gabinete cu ta eherce tarea di gobierno, e procedura pa forma un gabinete nobo ta cuminsa.
“Despues di eleccion, diasabra mainta e presidente di Conseho Electoral Glenn Thodé lo sinta hunto cu gobernador riba e pre resultadonan di eleccion. Despues riba dialuna nos lo cuminsa pa tene entrevistanan pa consulta cu diferente instancia y personanan riba nos isla tocante ken lo ta e formado y informado pa forma e gabinete di gobierno nobo”.
Entre otro riba dialuna lo sinta cu presidente di Conseho Consultativo, presidente di parlamento y e prome minister demisionario. Den e dianan siguiente e Gabinete di Gobernador tambe lo sinta cu e representantenan di tur partido politico cu a participa cu eleccion y varios instancianan, sr. Budhu Lall ta splica.
“Naturalmente nos lo haya sugerencia di parti di e instancianan y di pueblo, pero en todo caso lo ta un persona cu tin e confiansa di e parlamento nobo. Tambe nos no ta tuma decision concreto te cu e resultado concreto di eleccion ta conoci”.
En caso cu e procedura pa forma un gabinete tarda, sr. Budhu Lall ta contesta cu no ta importa con largo e proceso dura, si no ta importante pa tur e responsabilidadnan keda claro.
Si tin un deadline pa forma gabinete sr. Budhu Lall a clarifica cu ‘mi no conoce ningun fecha final cu a wordo palabra’.
Pa finalisa sr. Budh Lall a bisa cu TeleAruba ta e unico medio cu lo por ta presente den e Gabinete di Gobernador pa tuma potret of video durante eleccion.
Discurso prome minister
Ayera prome minister Mike Eman tambe a tene su discurso nacional riba television, papiando riba e periodo di gobernacion cu enfoke riba e plan di energia sostenibel, reapertura di refineria, Green Corridor, Watty Vos Boulevard, hospital, mudamento di waf y mehoracion di barionan.
“E idea ta cu tur loke haci mester ta enfoca den haci Aruba sostenibel pa famianan, medio ambiente y desaroyo economico. Pa e siguiente periodo di gobernacion 2017-2021 tin plannan grandi pa bay wordo ehecuta. Asina gobierno kier pa prosperidad yega cerca tur hende”, asina sr. Eman ta informa. E ta papiando di prioridadnan manera logronan pa financia publico, reduccion di crimen, cuido medico y medio ambiente. “Educacion ta un punto esencial pa e siguiente periodo di gobernacion.” Como lider di AVP, sr. Eman ta vota mañan 3’or di atardi na Colegio Arubano.
