Diamars gobierno di Hulanda a presenta nan presupuesto 2018 aunke e gobierno aki ta demisionario como cu no a forma un gabinete nobo ainda despues di eleccion na maart.
Por mira cu Hulanda ta reserva mas placa pa combati criminalidad. Entre otro lo inverti 48 miyon euro den un team special pa asina actua contra e lasonan di mundo ariba y mundo baho riba e islanan Hulandes Caribense.
Manera tabata conoci di aña pasa Kustwacht tambe ta haya placa extra. Hulanda ta bisa cu ta tene cuenta cu e situacion na Venezuela cu por tin ‘consecuencianan grandi’ pa e islanan Aruba, Corsou y Boneiro. Pero algo concreto no por mira bek den e presupuesto 2018, con lo yuda e islanan aki den e caso nan ta wordo confronta entre otro cu un gran cantidad di refugiado.
E enfoke di e placa presupuesta (ariba 120 miyon euro) ta keda riba bon gobernacion y cumplimento di ley/derecho. Tambe lo inverti den proyectonan social economico unda e atencion ta keda riba colaboracion entre e paisnan den Reino.
Palabranan di Rey
Manera di custumber e di tres diamars di september ta conoci como Prinsjesdag unda e Rey tambe ta duna su Troonrede. Su prome palabranan tabata dirigi na e habitantenan di St. Maarten, Saba y St. Eustatius cu ta sufri despues di horcan Irma. E Rey ta bisa cu gobierno di Hulanda lo yuda unda cu por y cu e parti aki di Reino lo no keda para su so ora di cuminsa traha riba e rehabilitacion di e islanan.
