Ayera Ministerio Publico (OM) a celebra e apertura di su edificio nobo na Rumbastraat (patras di edificio di belasting na Cumana). Mas importante: ayera tambe a habri e Veiligheidshuis.
Veiligheidshuis ta un plataforma di siguridad unda no solamente e partnernan den e cadena hudicial manera OM, polis, Reclassering, Voogdijraad ta traha hunto, pero tambe cu e fundacion nobo FMSA pa salud mental y otronan cu kier participa. Esaki e procurador general (PG) Alexander van Dam ta splica ayera na un gran cantidad di invitadonan. E problemanan awendia cu husticia ta enfrenta cu specialmente hoben criminal cu ainda tin e miho chens pa drecha, ta hopi complica. Banda di esaki tin muchanan hopi jong, 10/11 aña cu por causa hopi molester y menasa den un bario sinembargo polis no por haci mucho cu nan. Nan no por cera nan y no tin un instituto special pa duna e muchanan aki e tratamento necesario.
Ademas e problemanan bou hoben tambe ta relaciona hopi biaha cu problemanan den famia. Por ehempel e mama ta den debe pues asina mester yud’e tambe pa asina ora e hoben ta bay bek na su famia, e situacion tambe a drecha na cas.
Por bisa cu pa decadanan ta papia na Aruba pa tin un maneho y accion integral pa anda cu problemanan cu criminalnan structural, y manera menciona specialmente di hoben. Sin cu esaki ta wordo realisa. Cu e Veiligheidshuis awor e instancianan hunto cu gobierno a pone un paso grandi den e direccion aki. Sinembargo tin cierto retonan ainda, entre otro falta di fondo, personal y tambe cu ora di haci palabracionnan mester actua tambe. “E por ta exitoso so si tur hende realmente ta coopera y haci locual nan ta bisa”, asina e PG ta expresa, pero tambe e representante di Reclassering ayera y minister di Husticia Arthur Dowers.
Bon Dia Aruba lo elabora mas riba e concepto di Veiligheidshuis y e problemanan actual di siguridad na Aruba den su proximo edicion.
