Awe den oranan di merdia e compania aereo di Republica Dominicano Sky Air tin programa su vuelo di inauguracion for di aeropuerto Reina Beatrix pa e aeropuerto internacional Almirante Padilla di e ciudad di Riohacha na Guajira (Colombia).
Camilo Muyale ta informa na Bon Dia Aruba cu tur permiso tabata cla caba cerca nos autoridad local di departamento di Aeronautica Civil. Mientras cu na Colombia e proceso aki a wordo concretisa positivamente.
Sky Air lo bula e ruta aki cu un avion tipo Beech 1900 delta cu capacidad pa 19 pasahero. E ta un avion cu ta bula hopi rapido, entre Aruba y Riohacha den 42 minuut. Nan lo cuminsa cu dos vuelo pa siman, esta diabierna y dialuna. Pero nan ta premira cu lo bin cu un tercer vuelo minimo.
Aworaki e compania aereo di Republica Dominicana cu ta bay opera e ruta aki ta trahando pa asina establece su oficina na nos aeropuerto y tambe den aeropuerto na Riohacha. E ciudad aki a modernisa su aeropuerto pa brinda un miho servicio.
Den pasado e ex compania local Tiara Air a yega di bula pa e ciudad capital di Guajira Colombiano, e no ta un destinacion desconoci localmente.
