Ayera parlamento di Aruba a scoge su presidente y vice presidente nobo como cu awe ta habri e Aña Parlamentario nobo. Sinembargo dos parlamentario a protesta cu nan ausencia entre otro pasobra no ta cumpli cu entre otro entrega di presupuesto 2018 pa motibo di eleccion.

Banda di esaki sr. Bikker ta expresa cu e eleccion pa un presidente nobo di parlamento ta un formalidad. “Na momento cu tin un eleccion pa presidente di parlamento y vice presidente di parlamento e resultado semper ta cu e candidato di e fraccion cu ta sostene e gobierno ta sali for di e votacion.”

Pues asina nada e cambia ayera y asina e mesun personanan, Mervin Wyatt-Ras como presidente (riba potret ayera durante e reunion) y Rene Herde como vice presidente a keda eligi.

Manera Bon Dia Aruba a trece dilanti gobierno tambe a dicidi di no entrega e presupuesto 2018 pa motibo di eleccion. Asina nan kier duna espacio pa e gobierno nobo. Esaki no ta prome biaha cu un gobierno ta dicidi esaki: gobiernonan di MEP y di AVP anteriormente a yega di tuma decision igual. Aunke gobierno mester entrega su presupuesto tur aña 1 september ultimo na parlamento, segun nos constitucion.

Aña Parlamentario ‘hopi straño’
Banda di esaki sr. Bikker ta expresa cu e ‘awe ta un apertura di Aña Parlamentario hopi straño. Un Aña Parlamentario normal ta pa deliñia maneho di e gobierno. Pero hecho ta cu otro siman ta eligi un parlamento nobo y e gobierno su mandato ta yega na su fin. Ademas normalmente tur e miembronan di gabinete Mike Eman ta presente na momento di apertura di e aña parlamentario, awo tin un situacion hopi straño cu tin un miembro di e gabinete deteni. Ademas no tin un presupuesto di pais Aruba entrega.”

Segun e parlamentario Aruba a hereda e historia Parlamentario di pais Hulanda caminda cu nan tambe tin apertura di e periodo Parlamentario cu ta wordo yama Prinsjesdag, unda cu ta delinea e maneho a base di e presupuesto cu ta wordo entrega na tempo. “Sinembargo na Aruba debi cu no tin presupuesto y riba dje e gobierno su mandato ta bay termina aki par di dia,e apertura parlamentario ta bay ta un simpel formalidad debi cu mester cumpli cu ne segun nos constitucion.”

Sr. Bikker ta bisa cu e y colega Lopez Tromp a dicidi di no forma parti di e reunion ayera pa eligi e presidente di parlamento como protesta ‘debi cu como parlamentarionan tin simannan ta pidi reunionnan riba temanan sumamente importante’. “Entre otro cu Aruba actualmente tin un minister den funcion deteni, fronteranan di Aruba ta insigur y na unda cu practicamente atraconan ta tumando luga tur dia na Aruba. Hasta e atracadonan ta comete nan atraco sin cara tapa y pa no papia mes di e tantisimo armanan cu ta circulando libremente na pais Aruba ultimamente.”

A pidi presidente di parlamento sra. Wyatt Ras pa yama diferente reunion pero no ta haya oido di e presidente di parlamento. “Pero si a tuma nota di e reunionnan lief pa gobierno cu e presidente di parlamento a yama.” Tambe tin basta luna cu no ta mira presencia di prome minister den parlamento pa duna cuenta di su maneho di pais Aruba, segun sr. Bikker.

Bon Dia Aruba no a logra di haya comentario for di sra. Wyatt Ras ni di sr. Herde.