Colombianonan victima di violencia por busca informacion riba ley 1448

Canciyeria di Colombia pa medio di su consulado na Aruba ta informa na nan conciudadanonan riba Ley di Victima y Restitucion di Tereno (Ley 1448). E ley aki a wordo crea pa duna atencion, asistencia y reparacion na e victimanan di e conflicto arma interno cu durante  añanan Colombia a pasa aden.

Hopi Colombiano a bandona nan pais pa motibo cu nan famia a wordo asesina y nan bida a wordo menasa, y algun di nan eventualmente a bin establece na Aruba pa scapa di   e situacion di violencia aki. Consulado di Colombia ta porta habri pa atende esunnan cu a bira victima di e conflicto arma interno na Colombia, y entrante otro luna di april nan lo cuminsa cu un proceso di informacion rond di e ley aki.

E ley menciona ta establece un conhunto di medidanan hudicial, administrativo, social y economico ya sea individual of colectivo, den beneficio di e victimanan di violacionnan grave di acuerdo cu e normanan internacional di derechonan humano pa causa di e conflicto arma na Colombia. Un pregunta tin di haber si abo ta wordo considera victima of no.

Di acuerdo cu e ley aki, victima ta e personanan cu individual of den forma colectivo a sufri daño pa echonan cu a sosode fei 1 di januari 1985, como  consecuencia di infraccion di e Derecho Internacional Humanitario. Of violacionnan grave di acuerdo a e normanan internacional di e derechonan humano cu a sosode pa causa di e conflicto interno na Colombia. Entre nan e hendenan cu mester a bandona nan teritorio cu ocasion na disturbio y tension interior of violencia generalisa.

Si abo ta considera bo mes victima di e conflicto arma na Colombia, bo por haya mas informacion riba e proceso aki na Consulado di Colombia na  Aruba. Asina bo ta haya sa mas riba e proceso di inscripcion den e Registro Unico di Victima (RUV). Unabes cu bo ta presenta e solicitud di inscripcion di RUV cerca un funcionario di e consulado, bo mester duna informacion tocante: 1.Datonan di identificacion di cada persona afecta. 2. Datonan manera genero, edad, situacion socio economico, situacion y tipo inhabilidad, rasa, etnia, etc… 3. Circunstancia di tempo, modo, luga di e echo cu a haci cu abo a bira un victima. 4. Datonan di contacto den exterior y na Colombia 5. Informacion riba familiaridad cu e victima den caso di homicidio y desaparicion forsa.

Consulado

E declaracion aki cu abo ta realisa den e Consulado di Colombia na Aruba lo wordo balora dor di Unidad pa Atencion y Reparacion Integral di e Victimanan na Colombia. Consulado di Colombia su funcion ta esun di duna orientacion, tuma e declaracion y informa riba e decision di e Unidad aki. Den un periodo di 60 dia   Unidad pa Atencion y Reparacion Integral di e Victimanan na Colombia lo duna un contesta riba e solicitud cu a wordo haci pa medio di e inscripcion den RUV.

Si bo solicitud ta wordo honra bo lo tin acceso na e siguiente derechonan si bo ta permanece pafo di Colombia: Identificacion, Indemnisacion, Medidanan di Satisfaccion y Restitucion di Tereno. Si abo boluntariamente ta dicidi di bay biba na Colombia, bo lo tin derecho pa wordo re ubica den caso si abo mester a bandona bo pueblo. Tambe bo lo tin derecho na medidanan di atencion, asistencia y reparacion segun e echo di violencia cu bo a pasa aden.

Pero den caso cu bo solicitud como victima di e conflicto arma no ta wordo honra, bo lo por presenta dilanti consulado un recurso di re posicion pa e funcionarionan di Unidad pa Atencion y Reparacion Integral di e Victimanan na Colombia cu a tuma e decision ey.  Den caso cu abo mester asistencia legal, tanto Defensa di Pueblo y Procurador General di Colombia, a crea canalnan virtual pa responde na e demanda  aki.