E situacion global di falta di personal riba tereno di enfermeria ta un situacion ta algo cu ta afecta Horacio Oduber Hospital (HOH) tambe y mester anda constantemente cu ne. Esaki ta pone un presion extra riba e cuerpo di enfermeria existente.

Director di HOH, Ezzard Cilié ta conta cu nan tin alrededor di un aña y mey ta atendiendo cu e problema aki di falta di personal pa cuido di e pashentnan. Den e trayecto aki e ta haya cu por fin nan por yega na un acuerdo tambe cu specialistanan pa yega na un modo pa atende cu e asunto aki di un forma responsabel. Ya cu segun su persona un hospital sea na Hulanda of na Merca si no tin hende suficiente pa traha nan ta gewoon cera. Pero aki na Aruba so nan mester mantene habri mas cu ta parce cu no tin hendenan pa wak pa e pashent.

Ta yega un momento cu nan ta considera hunto cu e mediconan cu ta iresponsabel pa sigui asina. P’esey  nan a bin cu e medida di reduci e cantidad di cama durante e temporada aki di mudamento, ya cu nan tin otro aspectonan adicional pa anda pa atende tambe. Nan tin mester urgente di 30 nurse. Hospital mester busca un forma agresivo pa yena e buraco ey.

 

Falta di personal
A pesar di e situacion aki e ta haya cu por fin nan ta yegando na un fin. Adicional na e decision cu nan a tuma di cera of reduci temporalmente 30 cama pa asina e cuido cu e pashent por haya ta keda sigur bon. Esaki probechando e mudamento di e pashentnan pa edificio nobo den cuadro di renobacion y expansion di hospital.

Pero hospital ta consciente cu mester busca mas personal di cuido pa habri tur e camanan ora cu tur proceso di mudamento ta totalmente cla y asina nan por haya e 30 cama bek.

Director di HOH ta bisa cu tur dia nan ta haci empeño pa busca nursenan via consultant di afo. Tur e proceso aki ta ocasiona gasto di placa pisa ya cu dificilmente nan por atrae hendenan si nan proposicion di trabou no ta atractivo.

Tambe nan ta busca personal den nos region y den cinco hospital na Hulanda. Pero e scarsedad cerca nan tambe ta un realidad tambe, y ta dificil pa recluta personal fei di reino Hulandes mes.

Esey ta nos meta pero realidad di bida ta bisa cu nos no ta hayando reaccion. E hendenan ey no ta drenta,  segun sr. Cilié.

E no ta descarta cu tin biaha nan ta haya, pero e cantidad cu nan mester no ta bay hay’e di e forma ey. Por ta mester bay cu un strategia mas fuerte, entre nan bay cu un team di 10 hende pa busca personal di enfermeria na Hulanda. E ta anticipa cu algo asina mester tuma luga. El a recorda cu 20 aña pasa nan a busca personal na Filipina y nan a adapta hopi bon na Aruba.  Sr. Cilié ta bisa cu no por kita e posibilidad cu eventualmente nan mester bay Filipina atrobe.

Mas claridad
Pero aworaki nan no tin mucho claridad. “Mi ta papiando un cos cu mi no tin un claridad completo ariba dje. Pero cu nos tin problema cu ne,  si”, e ta bisa. E ta habri pa scucha idea cu por alivia e situacion aki.

Tin un grupo den EPI (Educacion Profesional Intermedia) cu ta formando pa drenta den mundo di enfermeria pero esaki ta tuma luga den dos aña. Mientras cu e necesidad di nurse ta actual y agudo. “No aki dos aña”, e director ta splica.

E ta laga sa cu no ta cuestion cu e no por soluciona e problema, pero e problema ta sinta cu no tin nurse disponibel. Nan tin un plan pa ehecuta cu EPI, pero esaki no ta bay yuda mengua e situacion den hospital den proximo dos aña. Sinembargo e proyecto bunita aki cu EPI lo cay na caminda aden y hospital ta yudando sin garantia.