E presupuesto 2018 di Husticia ta keda casi mescos cu a aña pasa sinembargo pa combati criminalidad lo bin extra placa, segun minister di Husticia Arthur Dowers. Nan ta trahando riba un plan cu ainda e no kier divulga cu lo trece sigur 15 miyon extra riba mesa.
Riba pregunta di Bon Dia Aruba si lo ta pensando direccion di un impuesto, manera a haci entre otro pa AZV, y como comunidad ta pidi pa extra medida di siguridad, e minister ta contesta: no. Tin un otro forma con nan kier yega na e fondo extra aki, sr. Dowers ta bisa, sinembargo mas detaye e no kier duna awor.
Banda di esaki pronto un ley ta bay parlamento e ta splica, unda ta duna husticia mas poder pa interveni den educacion di mucha. “E ley tambe ta duna posibilidad pa bisa e mama e mucha mester ta paden 6’or y pa e ora e mester ta paden.” Pasobra e minister ta bisa prevencion pa evita cu hobennan local ta cay den criminalidad, ta algo cu ta duna mas fruta den e combatimento di criminalidad na Aruba. E mester ta un intervencion integral unda husticia ta traha cu instancianan riba otro tereno, esta social, enseñansa, etc.
Criminalidad di Venezuela
Banda di esaki e ta confirma locual Bon Dia Aruba a skirbi siman pasa cu e situacion na Venezuela ta causa hopi criminalidad na Aruba. Esaki ta conta pa henter e region, e ta remarca. Pa motibo di esey e introduccion di Esta lo bin pronto pa asina tin miho bista riba e Venezolanonan cu lo drenta. Tambe e asunto di arma, manera conoci tin un negoshi grandi awor den arma ilegal for di Venezuela, tambe ta afecta Aruba, e mandatario ta bisa. Mayoria di e atracadonan ta Venezolano cu den un of otro forma ta haya yudansa di local, e minister tambe ta splica, asina confirmando locual Bon Dia Aruba a skirbi siman pasa despues varios atraco a tuma luga atrobe. E minister ta indica cu mayoria di e atracadonan te ainda, nan ta gara.
