Bon dia lesado, follower, cliente y otro interesado. Awe riba dia di prensa nos kier gradici bo pa sosten na nos medionan di comunicacion: Bon Dia Aruba, Aruba Today y Bon Dia 24.

Kico bo sosten ta nifica?
Bo sosten ta haci posibel cu nos por keda inverti den periodismo cu ta imparcial, profesional y innovativo. Cu nos por keda train un generacion nobo di periodistanan y stimula mente creativo, critico y consciente di e rol cu un periodista tin den un comunidad democratico.

Cu bo sosten nos por verifica informacion, un parti di nos trabou cu ta hopi importante pero ta dificil pa haci na Aruba unda tin poco fuente di informacion fidedigno, unda acceso di informacion ta limita y of depende di lasonan comercial, politico of familiar. Y tambe unda publico ta midi credibilidad y popularidad di un medio a base di con lihe nan ta publica noticia. Speed den publicacion di noticia ta un riesgo grandi pa yega na e berdad.

Cu bo sosten nos por trece informacion pa educa. Hende ta depende mas y mas riba fuentenan social unda ta share kico nan ta haya interesante. Informacion cu nan no ta haya interesante ta drenta dificil den e gruponan di friends, famia, colega, etc. Of fuentenan di informacion, comercial, politico, mester paga pa drenta e gruponan aki cu ta birando mas inclusivo pa nan consumo di noticia, informacion. Bo digital footprint cu bo ta laga atras ta determinando tambe ki informacion bo ta ricibi. Momento bo ta Google, like of share, ora bo ta upload, download, e-mail. Si bo ta busca awor riba vakantie Colombia, of menciona esaki den bo Facebook, un poco despues bo ta ricibi cantidad di sponsored posts di aerolinea, hotel, restaurant, etc. Bon Dia ta trece informacion tambe cu ta fuera di bo zona familiar, sponsored of a base di bo digital footprint. Porta no tur dia nos por capta bo interes, pero riba e dianan cu nos logra, nos ta mustra nos balor.

Cu bo sosten nos por fungi tambe como testigo di desaroyonan den comunidad. Awendia social media a percura cu nos tin mas testigo civil y e aña aki nos por mira cu Facebook Live a contribui hopi na e desaroyo aki. Nos por mira cu esaki hasta ta duna ciudadano mas derecho ora por ehempel autoridadnan ta comete eror y purba di sconde esaki despues. Caso di Mitch Henriquez ta un ehempel di dje. Pero esun cu e camara por haci hopi daño tambe, por manipula y awor cu mas app nan sofistica por haci esaki di biaha, live tambe. Periodistanan mester fungi como testigonan imparcial, consciente y traha den un forma balansa unda ta trata hende fair. Unda no ta copy paste, papagay, fabrica of falsifica informacion. Un cobertura periodistico nunca por ta 100% obhetivo, semper e ta mira via di wowo colorido. Sinembargo un periodista tin training, educacion, experiencia pa haci su trabou segun criterionan profesional, cumpliendo cu su deber democratico, funda den derechonan humano, cual ta haci e diferencia.

Cara mas social
Hopi ta bisa cu nan ta balora Bon Dia como cu nos ta un fuente neutral. Nos mes kier añadi cu nos ta un fuente investigativo y 100% independiente den nos noticia. Pero nos mes ta sinti cu esaki no ta suficiente teniendo cuenta cu Aruba su comunidad y e rol cu nos como medio por hunga. Banda di informa, educa, nos kier mustra un cara mas social y constructivo. Pa motibo di esey den nos noticia nos ta y lo pone mas atencion riba desaroyo social, e trabou di e fundacionnan social, pone luz riba hende cu ta yuda otro, hende cu ta busca nan derecho. Gruponan cu ta keda scondi mientras ta forma un parti grandi den nos comunidad. Gruponan cu ta wordo bagatelisa, cu no ta wordo scucha, hasta discrimina.


Y finalmente nos no kier critica pa critica. Nos kier yuda tambe pa yega na solucion di problemanan social. No ta suficiente pa nos mustra kico ta e problemanan, nos tambe kier trece informacion con pa yega na solucionnan, alternativa.

Esaki ta promesanan cu lo ta un reto grandi pa nos organisacion chikito. P’esey nos kier pidi abo como lesado, follower, cliente, interesado,por fabor keda envolvi. Keda den contacto cu nos, duna critica, of mas leu sosten, colaboracion si por. Esey ta e miho regalo cu nos por ricibi, awe celebrando dia di prensa.