Gobierno faltando opcion creibel

Cu aresto ayera di secretaria di ministro Paul Croes, ta parce cu nos ta yegando na culminacion di e investigacion, unico den nos historia. Algun tempo pasa a aresta caba un consehero di e ministro, cu aparentemente lo tabata envolvi den e fundacion di campaña di e ministro tambe. Remarcabelmente, e no ta registra na Camara di comercio como miembro di directiva di e fundacion. Di tur manera, tanto e persona como e fundacion ta obheto di e investigacion criminal aki. E detencion ayera ta confirma cu pa Ministerio Publico esunnan clave den e despacho di e ministro lo ta envolvi den e caso, dunando mas base na nan sospecho di e prome momento caba, cu ta e ministro mes ta e cabes di loke ta parce un berdadero organisacion criminal. Desde e prome momento e mero volumen di e caso tabata mustra riba un berdadero organisacion cu e meta pa comete crimen, cu e sospecho di cuminsamento caba cu e ministro mes lo tabata na cabes. E prueba final lo bay resulta den corte.

Atencion pa e caso no a keda limita na Aruba so. Por cierto e corant Hulandes De Telegraaf a publica un articulo ayera den cual ta trata caso di no menos cu tres persona, di cual dos actualmente ministro, cu tabata asunto discuti durante e bishita di despedida di ministro di Asuntonan di Reino Ronald Plasterk. Banda di Paul Croes lo a referi na e multiple kehonan deposita na Ministerio Publico contra e ministro encarga cu infrastructura, pa emision di tereno na simpatisante di AVP cu despues a bende esakinan ganando miyones. Tambe ta referi na e caso di e candidato pa ministro Richard Visser, cu lo tin problema pa pasa e screening pa motibo di e pasado dudoso di su partner Erbudak. Segun e corant Hulandes esaki a discuti cu prome ministro Mike Eman, combersacion cu no a bay den mucho bon ambiente. Esey tabata obvio, no tabatin sikiera un declaracion conhunto cordial na final.

Cu tur e turbulencia nobo aki, continua campaña manera nada no a pasa, ta birando dia tras dia mas dificil pa e partido berde. Unda cu bay, unda cu bira, hende kier un splicacion debido kico ta pasando. Naturalmente cu e fielnan, e nucleo leal di partido, lo no kere nada tanten cu hues no condena e culpabelnan y nan bay cera. Pero den esaki no ta relevante loke e hard core di partido ta pensa. Ta bay pa esunnan cu na 2013 a duna e partido e beneficio di duda, pero no si e asunto ta degenera te na e nivel aki. Ta net esunnan cu ta pertenece na e swing vote aki ta e hendenan cu ta critico y no ta mara na lealtad cu tal o cual partido. Nan por dicidi masha lihe cu un partido cu mas di un ministro cla pa bay dilanti hues no ta loke nan ta desea di apoya.

Pero, kico ta e opcionnan concreto pa prome ministro y su gabinete den e asunto di delincuencia grandi den nan seno? Habri man laga Paul Croes cay na e altura aki ta dificil. Mantene apoyo manera te awor, tambe tin consecuencia. Awor aki no tin un alternativa cu por tin credibilidad den pueblo. Ademas cu den futuro, cu un otro gobierno, por conta cu varios investigacion grandi, manera riba e caso di hedging di prijs di fuel oil pa WEB, cu por cierto na placa tabata e daño mas grandi cu Aruba a sufri den ultimo añanan. Otro ministro mas di e actual gabinete cu lo mester bay duna cuenta pa loke a pasa ey.

Mientras cu velocidad di lamper e panorama electoral ta cambia pa e partido den gobierno, perspectiva ta malo hasta si nan logra mantene nan mes den gobierno. Mas probabel ta cu Reino na e momento aki ta contempla e situacion den cual si tin un bashi di poder, cu ta exigi actuacion di banda di Reino. Den un caso asina no ta exclui e posibilidad cu Reino ta pone poder ehecutivo den man di gobernador via un decreto real. Prome cu bolbe na eleccion pa eligi un parlamento nobo, lo bay probecha pa regla algun cos via ley di Reino. Entre otro e ley riba financiamento di partido politico, cambia autoridad di ministro di husticia pa no por mete mas den trabao di OM, y cambio grandi den set up di gobernacion pa impedi e tipo di corupcion aki, na tur nivel.

Dia pa dia ta bira mas cla cu Reino a dicidi cu ta basta cu Aruba, cu ta bira tempo pa pone orden den un luga totalmente corumpi, cu varios ministro procesa hudicialmente proximamente, y un prome ministro cu ta haci manera cu nunca a yega di pasa algo abnormal. Pero no ta e mes a bisa cu e tabata sa mas cu un aña pasa caba?