Parlamentario Desiree de Sousa Croes (AVP) ta e autor di e famoso amienda 7 cu ta busca cu e parehanan di e mesun sexo cu ta biba hunto por gosa di igualdad, ta haya cu tin mas ley discriminatorio. Sea mester cambia ley pa inclui hende cu awor ta exclui pa motibo di sexo of limitacion.

Actualmente pa ehempel e ta mira cu tin un discriminacion den nos leynan di impuesto. Algun di e parti di e ley aki ta considera e hende homber automaticamente como cabes di cas of di hogar. Siendo cu hopi famia manera nos ta conoce, of sea no tin un hende homber mes, of e hende muhe por gana mas cu e hende homber.

“No ta pasobra automaticamente bo tin e sexo eynan, e ta nifica cu bo ta cabes di cas financieramente”, e ta bisa na Bon Dia Aruba. Esaki ta depende di e constelacion di e nucleo di famia con e ta conforma. Como parlamentario y hurista cu e ta haya cu gobierno no por tin leynan cu ta haci un distincion entre muhe cu homber den e sentido aki.

Tambe pa e aspecto di salario y oportunidadnan laboral tin hopi hende muhe ta sinti cu den nan carera nan ta wordo stroba pasobra nan ta hende muhe. Por ehempel dunadonan di trabou no ta tene cuenta ora hende muhe ta na estado. Sra. Croes ta demanda mas tempo tambe pa e hende muhe por recupera despues di embaraso. Te ainda e ta wak cu e tempo aki otorga pa nos ley ta hopi cortico tambe. Nan ta cambionan den nos ley cu mester tuma luga y como parlamentario nan mester keda haci esfuerso pa nan por mira berdad cu no tin discriminacion, e ta bisa. Banda di discriminacion di sexo e tambe ta menciona persona cu limitacion.

Iniciativa di ley

El a entrega un ley cu e ta spera cu lo wordo trata despues di eleccion si nan ta haya e confiansa di pueblo. Esey ta un iniciativa di ley trato igual y cu el a entrega na 2015. E iniciativa aki a bin bek y ya caba el a haci e cambionan necesario. Den e ley aki un di e puntonan cu e ta trece dilanti y cu ainda no ta regla den nos ordenamento huridico, ta pa e persona cu limitacion cu ta den rolstoel por drenta edificionan. E ta menciona cu personanan handicap no por drenta den un reunion publico den parlamento, ya cu nan edificio no ta condiciona pa e hendenan den rolstoel.

Otro ehempel cu e ta duna, tin di haber cu e personanan diabetico. Tin biaha tin seguronan cu ta wordo nenga na e persona aki debi nan condicion di salud. Esaki ta otro aspecto cu e ley cu el a presenta lo percura pa bin cu un cambio.