Den caso di corupcion Ibis husticia a detene secretario di minister Paul Croes, S.A. ayera. Banda di e investigacion penal, gobierno te ainda no a divulga si nan mes lo haci un investigacion interno.
Desde 28 di maart husticia a scucha un total di 30 testigo y 21 sospechoso. Ocho di e sospechonan ey a wordo deteni pa interogacion. E sospechosonan cu ta den libertad, ta sigui como sospechoso den e investigacion. E decision tocante cua di e sospechosonan aki lo wordo persigui, ta den man di Ministerio Publico (OM) na momento cu e investigacion ta cla.
Banda di scucha testigonan y sospechosonan, e ekipo investigativo a traha e ultimo lunanan cu analisa e material cu a wordo confisca te awor. Particularmente e inventarisacion di cosnan digital cu a wordo confisca (informacion riba computer nan y por ehempel, telefonnan) ta costa hopi trabao, segun OM.
Investigacion interno
Manera conoci e gabinete ta keda mantene sr. Croes como minister. Pregunta ta keda ainda si nan lo duna ordo pa haci un investigacion interno. E echo cu tin un investigacion penal andando no ta exclui un investigacion interno di parti di gobierno mes. Esaki ta riba otro nivel y por mustra deficiencia por ehempel den maneho y manera di traha. Un investigacion aki por conduci na cambionan den maneho, operacion y control por ehempel. Tambe e por encera un evaluacion di personal y asina por conclui si mester mas educacion of den caso di fayo, tuma medida disciplinario. Hasta por kita personal.
Sinembargo te ainda no ta conoci si gobierno lo haci un investigacion interno.
