ATIA representando comercio ta bisa cu ta ‘preocupa cu e efectonan negativo cu e ‘turismo’no tradicional procedente di Venezuela ta trece cune.Venezuela actualmente ta pasando den un periodo di crisis y e efectonan di esaki ta wordo sinti tambe aki na Aruba’.
Puntonan importante cu e organisacion ta menciona y ta pidi instancia concerni pa un solucion:
Situacion aeropuerto
E situacion na imigracion na aeropuerto di Aruba ta uno tenso mirando e proceso di control cu tin cu eherce pa turistanan procedente di Venezuela. E proceso di control di entre otro placa cash y alohamento di turistanan di Venezuela ta tranca e fluho di turistanan di otro destinacion cu ta yega nos isla.
Alohamento
Gran parti di e turistanan procedente di Venezuela ta bin pa algun dia y ta keda na casnan di famia y apartamentonan rond di Aruba enbes di na hotelnan. Alohamentonan y taxinan ilegal ta probecha di casonan asina pa haya un entrada extra sin cu tin cu paga belasting. Tambe por a mira casonan caminda no tin alohamento y ta opta pa keda drumi banda di nos beachnan. Diariamente por wak gruponan ta cana na pia rond di nos isla cu maleta. Alohamento den bario ta trece cune cu un cantidad di persona ta trafica den barionan residencial, creando tension pa cu barionan, cu cantidad di auto y hende na tur ora di dia.
Casonan di ‘raspao’
Manera menciona anteriormente e situacion financiero na Venezuela ta trese cune cu un grupo di e turistanan venezolano ta bin Aruba pa hasi esaki pa motibonan financiero. E grupo aki ta purba di tur manera pa por saca placa for di Aruba. E cantidad di casonan di ‘raspao’ ta alarmante, mirando cu hopi dollars cash ta wordo saca for di Aruba y ta tranca e cash flow aki na Aruba. ATIA ta sostene Aruba Bankers’ Association den nan accionnan contra negoshinan cu ta permiti casonan di raspao. Comerciantenan cu ta permiti casonan di raspao mester tene na cuenta cu esaki ta ilegal y cu por tin su consecuencianan.
Seguridad
Por ultimo, e preocupacion di mas grandi ta seguridad riba nos isla. ATIA ta preocupa cu e grupo di turista di Venezuela cu surpasa nan estadia turistico y ta keda atras na Aruba. E caso aki sigur ta alarmante mirando cu no tin control mas leu di ken ta e persona cu ta drenta y sali for di Aruba. Venezuela actualmente ta un di e paisnan mas peligroso na mundo. Mientras cu algun ta keda Aruba pa busca un miho porvenir, otronan ta busca e manera facil pa haya placa door di comete actonan di criminalidad.
Sugerencianan
1. Recientemente ATIA conhuntamente cu AHATA y FTA a sinta na mesa cu e ministernan concerni riba e topico di seguridad y a duna algun sugerencia pa mehora e situacion. Entre otro a wordo sugeri pa aumenta e presencia y control di polis den areanan di Palm Beach, Eagle, Low-rise y Oranjestad, specialmente durante oranan di anochi y den weekend; aumenta e presencia di polis banda di e beachnan; implementa y aplica un ley nobo pa banda di e beachnan; y pa implementa e proyecto di camara.
2. Tambe mester sondea e posibilidadnan pa introduci un visa di estadia pa turistanan procedente di Venezuela, manera cu tin pa turistanan procedente di Colombia, y introduci leynan mas estricto pa drenta Aruba.
3. Di parti di gobierno, ATIA ta spera cu bin cu un plan di accion a corto plaso pa atende cu e problemannan di seguridad y ilegalidad cu ta afectando nos isla. Turismo ta nos unico pilar economico y nos mester cuid’e.
