E reto mas grandi cu Stichting Ambiente Feliz tin ta yuda alivia e lista largo di personanan cu limitacion mental cu ainda ta wardando un luga of tehuis cu por cuida nan. Otro reto cu nan tin ta e aspecto financiero tambe.
E director di e fundacion aki, Lukee Croes a remarca cu nos tin basta persona cu limitacion ainda cu ta wardando riba lista di spera. Nan tin riba lista di spera hunto cu e Stichting voor Verstandelijk Gehandicapten Aruba (SVGA), un tiki mas cu 100 hende di diferente edad.
Segun sra. Croes nan ta wordo subsidia pa gobierno locual nan ta masha gradicido. Pero e subsidio ta masha limita pa atende cu e poblacion di hendenan cu limitacion mental of otro tipo di limitacion den nos sociedad. Pues e necesidad di e hendenan aki ta grandi den nos comunidad.
Ambiente Feliz tin 18 aña di existencia. Nan kier purba como fundacion pa baha e lista di spera y asina por atende e grupo aki. Pero e fundacion aki ta consciente di nan realidad: Nan ta un cas so cu cierto limitacion di capacidad. Actualmente nan ta atendiendo 24×7 un total di 20 cliente den e cas aki. Nan edad ta varia, esun mas jong tin alrededor di 34 aña y esun mas bieu ta bay cumpli 83 aña otro luna. Nan ta personanan cu limitacion mental. Esaki ta e minimo di condicion cu nan tin como fundacion pa tuma nan cliente den nan cas situa na Santa Cruz.
Di su banda SVGA tin por ehempel Cas Shabururi cu tambe ta ofrece servicio di cuido 24×7, pero nan tin 12 cliente. Kiermen nos ta papiando di un lista di spera di mas cu 100 hende, mientras cu apenas tin 32 luga so, pero e necesidad ta sigui crece keto bay.
P’esey sra. Croes ta haya cu esaki ta un reto grandi pa nos como comunidad tin pa conscientisa nos mes di e necesidad grandi cu e hendenan cu limitacion mental tin. Sin lubida cu nan tin derechonan y cu nan kier participa y socialisa. Nan tambe kier ta parti di nos comunidad y pa nan ta mas inclui den dje. E ta kere cu esaki ta un di e retonan cu semper nos mester keda lucha pa nos por ofrece e cuido aki pa mas hendenan cu limitacion mental.
Mas retonan
Nan vision tambe ta pa amplia nan localidad pa crea mas privacidad entre nan clientenan. Banda di e retonan di financiero y di localidad mas grandi, otro reto tin di haber cu calidad di servicio. Nan mester percura pa mantene un team cu personal cualifica cu por realisa e trabou aki. Ya cu e trabou aki ta uno cu por ta pisa, e director ta bisa. Esaki ta depende di e condicion di e cliente tambe. Banda di nan limitacion mental, nan tin clientenan cu tin problema cu bista, oido, impedimento fisico, etc..
Tambe nan clientenan ta confronta cu e situacion di edad avansa ta compaña cu diferente problema di salud. Tin biaha nan cliente ta haya Alzheimer, diabetes, epilepsia, etc.. E situacion di nan clientenan ta hopi varia locual ta trece su retonan pa nan personal pasobra e ta rekeri otro tipo di cuido y otro tipo di guia compara cu otro cliente cu por move. E ta rekeri cierto flexibilidad y creatividad, ya cu no tur ora nan ta conta cu tur cos cu nan mester. Sra Croes ta splica.
Tambe e personal mester tene cuenta cu e diferencia di edad entre nan clientenan ta trece su desafio. E clientenan mas jong ta mas motiva pa siña hopi mas. Mientras cu esunnan cu ya caba tin cierto edad kier hiba un bida mas trankilo. P’esey nan mester tin cu un plan of programa recreativo pa ofrece durante dia diferente actividadnan a base di e necesidad di nan cliente, e director ta haya.
Adopta un cliente
Sra. Croes ta hopi contento cu tin proyectonan manera Aqua48 cu recientemente a haci un donacion na e fundacion. Esaki ta un forma pa alivia nan peso. Tambe otro fundacion of organisacion cu ta traha pa brinda ayudo y proteccion na e hendenan mas vulnerabel den nos comunidad, manera muchanan, hende grandi , etc.. mester di e sosten aki. E tipo di ayudo aki ta sumamente di importancia pasobra sino hopi biaha nan no por realisa trabou di mantencion, etc., e ta bisa.
Sra. Croes ta conta tambe cu ademas di e ayudo financiero den forma di donacion of placa, nan tin necesidad di mas hende interesa pa haci trabou boluntario den e fundacion aki. E persona interesa por bira un amigo di Ambiente Feliz, unda como ciudadano ehemplar bo por adopta un cliente dunando un aporte di 25 of 10 florin tur luna.
Tambe nan mester di cierto material. Si tin compania cu ta bay cumpra un van nobo y esun bieu ta den bon estado ainda, e compania por yuda e fundacion aki cu tin mester di dje. Semper nan tin necesidad di mueble, cama, fan, etc.. e por ta nobo of di segunda mano pero si den bon estado. Esun interesa pa haci e donacion aki of kier yuda den cualkier otro forma, libremente bo por tuma contacto cu e directora di e fundacion pa papia riba nan necesidadnan. Mas info por haya riba www.stichting ambiente feliz.com of tambe nan Facebookpage.
