Odinsa y CIC ta invita pueblo di Aruba pa e ceremonia di apertura di e brug nobo na Spaans Lagoen. Carlos Zubieta, project manager a bisa: “Nos ta ofrece un evento pa conmemora e culminacion di e obranan como un muestra di aprecio y danki na e comunidad di Aruba pa e esfuerso y compromiso; ayudo y comprension demostra durante ultimo dos aña.”
ODINSA y CIC ta consciente y ta compronde cu e trabounan grandi di infrastructura haci na e caminda di Playa pa San Nicolas, aunke ta sumamente necesario, a trece cierto inconveniencia cu a afecta e mobilidad di e automobilistanan. Segun declaracion di Zubieta, e celebracion aki ta pa gradici pueblo pa e pasenshi durante e proyecto aki. “Ya nos ta terminando e fase di construccion di e proyecto y e espera di varios decada ta yegando su fin,” Zubieta a declara.
Grupo ODINSA S.A. y Caribbean Infrastructure Company N.V. (CIC) ta e companianan encarga cu diseño, construccion y tambe mantencion di Green Corridor. Fuera di Zubieta, e conferencia di prensa a conta cu presencia tambe di Michael Vrolijk, Project Manager di parti di Departamento di Obranan Publico (DOW) y Alex Amalfi, Director Financiero di ODINSA kende a yega Aruba pa reemplasa Zubieta. E ultimo aki a acepta algun luna atras un posicion mas halto cu un compania similar na Colombia.
E celebracion ta cuminsa pa 7or di anochi y lo core te 12or. E lo ta ubica riba e brug nobo mes y lo tin diferente momentonan special durante e anochi pa marca e dia special aki pa Aruba. Un y tur ta bon bini pa yega diabierna anochi na e brug pa asina comparti y ta testigo di e momento historico aki. E apertura simbolico lo ta diabierna anochi, pero te dialuna mainta lo tin acceso pa autonan.
