E periodista Cándido Ríos Vásquez, a muri a consecuencia di tiro di arma di candela na Veracruz, a pesar di cu e tabata bao un mecanismo di proteccion di Secretaria di Gobernacion. Den e atake a fayece tambe e ex inspector di Polis y ex candidato pa representante di Acayucan,Víctor Acrecio y su escolta. Cu e asesinato aki, a yega na e tristo marca di 120 periodista asesina desde aña 2000, y na 10 asesinato e aña aki.

E periodista tabata coresponsal di e corant Diario de Acayucan y fundado di e medio La Voz de Hueyapan y tabata conta cu siguridad di e Mecanismo pa Proteccion di Defensornan di Derecho Humano y Periodista di e Secretaria di Gobernacion. Ríos tambe tabatin asistencia huridico di e Comision Estatal pa Atencion y Proteccion di Periodista, despues di un denuncia haci na 2012.

Sin embargo, e dia siguiente, diaranson Roberto Campa, subsecretario di Derecho Humano di e Secretaria di Gobernacion, a nenga cu e asesinato di e periodista lo ta vincula na su actividad periodistico. Durante un conferencia di prensa, e funcionario a señala cu e asesinato ta presuntamente vincula na un persona cu tabata cu ne na e momento di e atake.

“Tur indicio ta mustra cu e atake tabata vincula cu un otro persona, no cu e periodista,” el a señala. Dia 13 di augustus ultimo, Cándido Ríos a comparti un video riba Facebook,den cual el a bisa cu su berdadnan ta incomodo pero cu a pesar di esey e lo a sigui bisa nan.

Ríos ta  e dies periodista asesina na 2017 te awor. E mayoria di nan tabata informando tocante hecho di corupcion o tocante crimen organisa.

Despues di e echonan aki, presidente Enrique Peña Nieto a anuncia medidanan extraordinario y mas presupuesto pa proteccion di periodista. Inclusive el a ofrece un recompensa pa esun cu denuncia e asesinonan. Sin embargo, ningun di e crimennan aki a keda resolvi.

Mexico ta un di e paisnan  mas peligroso di mundo pa eherce periodismo debi na falta di boluntad politico pa caba cu impunidad cu ta permiti gruponan criminal, funcionario corupto y cartelnan di droga silencia esunnan cu ta critica nan. Esey ta e conclusion principal di un informe special di e Comite pa Proteccion di Periodista (CPJ, na Ingles), cu ta bisa cu 120 periodista a ser   asesina den e pais desde aña 2000.