Ayera anochi na Marriott Ballroom hobennan a wordo reconoci pa nan esfuersonan den entre otro ramonan di arte, deporte y formacion social. Dilanti un sala yen e comision di Hoben y Talentoso a presenta nan escogencianan di hoben cu a resalta den nos comunidad.

Ichelle Simon, presidente di comision di Hoben y Talentoso ta splica kico e proyecto ta encera.

Sra. Simon a splica cu e idea principal tras di e proyecto ta pa ‘tur hoben tin un role model cerca di cas.’ Sra. Simon ta splica, “Nos kier duna hobennan e chens pa ta un bon ehempel den nos comunidad y asina inspira otro hobennan, di manera cu no mester busca mucho leu pa inspiracion.”

Nos reportero a tuma nota cu hopi di e hobennan cu a wordo honra ta personanan cu ya caba ta bon conoci den nos comunidad. A puntra sra. Simon kico ta e proceso cu e comision ta cana pa busca personanan cu lo por wordo nombra hoben y talentoso.

Sra. Simon a splica cu ‘t’asina cu e comision di Hoben y Talentoso ta acudi na diferente instancianan cu ta specialisa den ramonan di por ehempel deporte of arte pa por conseha nos. E instancia ta recomenda un hoben cu nan ta pensa ta digno di wordo reconoci.’

Segun sra. Simon, no por laga na banda cu hopi mayor, amigo of docente sa tuma contacto cu nan via medionan social of via miembronan di comision mes. Algun hobennan cu a wordo honra ta Daniela Hernandez, Victor Gomes, Angelle Stamper y Marko Espinoza, entre e 31 en total cu a wordo honra pa e di 5 edicion di e proyecto.

Daniela Hernandez

Daniela Hernandez (23) a wordo honra pa su blog riba internet, nombra Static Rouge Curves. Riba e blog aki sra. Hernandez ta dialoga entre otro di topiconan di feminismo. Sra. Hernandez ta splica cu ‘mi kier inspira hobennan y en especial hende muhe pa stima nan mes y acepta nan mes manera nan ta.’“Mi a cuminsa cu e blog 5 aña pasa y originalmente e tabata djis un blog cu tabata trata cu moda. Pero mi a haya hopi comentario cu mi tabata bisti bunita y specialmente pasobra mi ta un persona plus size. Esaki a inspira mi pa trece topiconan mas profundo hunto cu e aspecto di fashion.”

Victor Gomes
Durante e honramento, Victor Gomes (21) a wordo reconoci pa su entrepeneurship. Sr. Gomes ta e doño di e restaurant local Purely Green, cual el a habri den 2016. Sr. Gomes a expresa cu ‘riba e prome dia cu nos a habri mi tabata hopi nervioso, pasobra mi sa cu nos riba e isla no tin habito di come saludabel.’ Sinembargo, ‘despues di 1 aña y 4 luna nos mester muda nos luga pasobra unda nos ta awo ta mucho chikito.’

Sr. Gomes a comparti cu e publico presente e consehonan cu e ta sigui pa por sigui dilanti. “Kere den bo mes, sigui bo soñonan, no tin miedo di faya, pasenshi y mas pasenshi, y no lubida di unda bo a bini.”

Marko Espinoza

Un hoben cu tambe a comparti su storia cu e publico ta Marko Espinoza (29). Sr. Espinoza a splica cu e no a nace na Aruba, pero e ta sinti cu ‘tur cos p’ami ta cuminsa y caba na Aruba.’

Segun sr. Espinoza, su famia semper tabata hay’e dificil pa obtene un status legal na Aruba. “Cosnan normal manera inscribi na un scol y tin un seguro di AZV no tabata algo cu a bin facil p’ami.”

Sinembargo sr. Espinoza a splica cu e no a stop di soña y ela sigui traha riba su metanan. “Ora mi tabata chikito mi tabata keiro den ciudad cu mi tata y ora nos tabata pasa bestuurskantoor mi tabata pensa cu algun dia mi lo kier traha eynan.”

Sr. Espinoza a expresa cu ‘nunca laga un papel dicta bo bida. Semper sigui bo soñonan aunke cierto cosnan no ta bin asina facil.’