Den propaganda gubernamental semper ta papia solamente di e proyectonan grandi cu ta na caminda o den ehecucion caba. No ta intencion pa bay discuti aki y sense of nonsense di e obranan aki riba nan mes. Awor atencion ta bay na e trabaonan basico cu nos ta spera di mira cumpli bao di cualkier gobierno. Ta trata di e obranan den nos bario o bisindario cu ta nada di prestigio pero ta importante pa nos mes.
Nos por ta testigo awor di un caretera masha impresionante bao construccion entre aeropuerto y Pos Chikito. Aunke ainda e debate no a termina, nos por ta sigur cu e suma total ta bay ta cerca di 300 miyon florin, prome cu nos caba di paga tur cos den 18 aña. Pero, con ta para cu e otro camindanan na Aruba, den ki estado nan ta? Tur hende cu ta core auto, y esey ta un gran parti di e poblacion, por ta testigo di e mantenemento pober di varios di nan. Nos por menciona ehemplo tambe, cu disculpa na esunnan cu nos lubida: caminda den Rooi Frances; tin un parti den e saliña cu a keda drecha caba, pero a lubida e parti na Sabana Basora y den e rooi mes. Caminda di Sero Cristal – Koeriboeri – Matividiri, hopi aña sin mira asfalt. Isaac Wagemakerstraat na San Nicolas ta parce di no a haya asfalt nunca mas di tempo den añanan cincuenta cu a traha e caminda. Diamantbergweg igualmente y asina varios otro caya y caminda den San Nicolas.
Hasta e barionan bon no ta scapa di negligencia di nos autoridadnan, pasobra e caminda di desvia di Arashi te na entrada di Tierra del Sol ta un desastre pa hopi aña caba. Gobierno por bisa na su fabor cu nan no ta discrimina pasobra e bario ‘upscale’ aki tampoco ta mira nan caya drecha. Tambe e caminda dilanti e hotelnan grandi ta sperando un capa nobo, aunke na mas di un oportunidad nos mes ta bisa cu no mester haci tur cos pa turista prome. Pero mester dreche pasobra mester dreche.
Pero e problema di infrastructura no ta limita na caminda so, aunke nos mes gusta trata auto manera ‘baca sagrado’. Con ta para cu acera? Ni den Playa mes bo por bay cu un persona den bo famia cu no por cana y ta uza rolstoel. Berdad ta cu a drecha Caya Grandi aunke hasta di esey nos ta haya keho di ciudadano cu ta papia di e klinkernan poni manera ta e prome experiencia di e compania cu e tipo di trabao aki. O talbes esey ta berdad tambe? No ta bira tempo cu nos ta cuminsa exigi cu pa tur e belasting cu nos ta paga, ta cuminsa haci cos cu ta beneficia nos como ciudadano? Acceso na ciudad y tur oficina di gobierno pa tur hende, tambe e ciudadano cu mester haci uzo di rolstoel, mester ta algo cu nos no mester exigi, den tur e 7000 salarionan cu ta paga tur fin di luna, no tin un alma cu por ocupa su mes cu esey?
Anto ainda nos no ta papiando di e camindanan cu ta sali bay den e districtonan cu nunca a yega di mira asfalt o klinkers, cu excepcion di e proyecto di embeyecemento na Paradera. Bon trabao, pero di berdad ainda falta henter e resto di Aruba! Y di esey si no ta papia, pasobra esey a haci di fondo di e fundacion Tourism Product Enhancement Foundation (TPEF), aparentemente pa faborece esnan cu pa casualidad y nan suerte ta comparti e bario cu e ministro en cuestion. Awor bon, e idea mes el a copia di e ministro encarga cu Infrastructura, cu a laga fura henter e bario unda e ta biba cu klinker, loke sigur su bisiñanan lo a aprecia.
Pero, esey kiermen cu na Aruba bo mester bay wak prome si bo tin un politico prominente ta biba den e bario, prome bo cumpra of traha bo cas? Of por ta cu nos gobernacion ta asina avansa caba cu nan ta reconoce e derecho di cada ciudadano di biba den un ambiente ordena, cu caya y acera na orden, independiente di unda nan ta biba? Por cierto cu tin un parti di nos poblacion cu tin e dicha di biba den barionan mas bieu, unda e mandatarionan, cu hopi menos scol, mas di cincuenta aña pasa a traha bario cu caya, acera y sistema di riool. Asina sabi of ilumina nan tabata cu nan si, cu ni tanto recurso, por a logra haci esey? Anto tanto aña despues, nos mes no ta ni bin riba e idea cu lo ta algo masha normal pa haci? Ta nos mes ta haci e bida di e politico di turno facil, pasobra hopi cos cu lo mester ta logico pa nan haci, no ta sosodiendo anto nos no ta ni reclama! Lo ta recomendabel pa ora ordo strea pa e proyecto ‘Aruba di cinco strea’ cu aparentemente ta na caminda, nan corda riba e streanan pa resto di Aruba tambe.
