Lamentablemente Aruba ta cerca di teritorionan, particularmente Colombia y Venezuela, unda cu hopi droga ta wordo trafica, pues tur e departamentonan cu tin di haci cu husticia mester ta continuamente alerta. Minister di Husticia Arthur Dowers a comenta esaki durante di un conferencia di prensa dialuna mainta, agregando cu e resultadonan cu ta logrando cada bes ta mustra cu e departamentonan ta funcionando optimalmente.
Un di resultadonan cu e mandatario tabata referiendo na dje ta e hallazgo di droga den awanan teritorial di Aruba, cu a resulta den varios detencion y un cantidad grandi di droga confisca pa autoridadnan. El a felicita Warda Costa, Ministerio Publico, Cuerpo Policial y Aduana cu e trabao haci pa kita e cargamento di droga aki for di circulacion den fin di siman pasa.
“Mi ta sumamente contento cu e resultado aki,” Minister Dowers a bisa. Resultadonan bon ta bin ora cu pone facilidadnan y materialnan disponibel y tur esunnan envolvi ta pone cabesnan y esfuersonan hunto pa yega na resultadonan sumamente alentador, segun e titular di husticia.
Minister Dowers a bisa enfaticamente cu a palabra entre e departamentonan y instancianan encarga cu investigacionnan asina grandi, cu lo duna informacion preliminar so y lo duna informacion hopi “global”, pues a acorda cu no lo menciona detayenan di e caso pa no stroba e investigacion. El a haci un apelacion tambe na tur persona envolvi, como tambe prensa pa ta atento pa cu speculacionnan, y cu ora cu conclui e investigacion lo duna mas informacion y detayenan di e caso.
E mandatario a bisa tambe cu e no lo comenta riba cuanto droga a wordo haya, y informacion asina no ta cosnan cu ta conoci na momento cu confisca e cargamento, pero ora cu e wordo pisa.
El a conclui bisando cu Ministerio Publico lo duna mas informacion ora cu esaki ta disponibel.
