Minister Ronald Plasterk di Hulanda encarga cu Asuntonan di Reino a bishita Aruba ayera pa tuma su despedida como minister. “Ta bon pa hende aki realisa cu Hulanda no tin mucho interes pa asuntonan den Reino.”

 E ta continua: “E discusionnan na Hulanda, awor tambe cu e formacion di un gabinete nobo, ta concentra riba hopi cos pero no ta bay riba kico ta pensa di Aruba. Den e programanan di eleccion di hopi partido politico bo no ta ni haya un frase riba asuntonan di Reino.”

E minister ta bisa cu hende aki mester tene cuenta simplemente cu ‘number’: 98% di e habitantenan den Reino, ta Hulandes Europeo. “Eynan e interes ta bay.” Tampoco ta haya e sosten politico asina facil mas compara cu den pasado, e ta bisa. “Tin diferente partido, banda links y rechts, cu ta expresa laga nan mes anda cu nan asuntonan. Sinembargo mi ta kere ainda tin un mayoria solido cu ta sostene e relacionnan den Reino.”

Pero sr. Plasterk ta enfatisa cu e lo ta menos ‘efectivo’ si e islanan ta wak Hulanda pa bin cu solucion lihe. “Si ta bisa akinan: anos no por haci nada tampoco, abo mester soluciona. E ora nan (politica Hulandes, red.) ta pensa tambe: cu e comportacion ey, nos no por haci mucho. Pero si boso mes ta cuminsa den forma positivo y indica cu mester ayudo pa hacie miho, e ora sigur por haya sosten na Den Haag ainda.”

Hulanda no ta bay yuda Aruba awor
Sinembargo te awor Hulanda no ta bay yuda Aruba fia na un interes mas abou. Esaki tin di haber cu e financia di nos ainda no ta riba e nivel palabra pa e organo di supervision financiero CAft por duna un conseho positivo. Minister Plasterk si a indica na gobierno di Aruba cu e ta positivo pa e futuro cercano y cu e ta spera den termino corto cu e yudansa lo bin. “Mi kier a realisa esaki caba durante e periodo di gabinete actual.” Pero e ta enfatisa cu tur ta depende di e conseho di CAft. Hulanda ta den formacion di un gabinete nobo, pero ni esaki lo tin su efecto, e ta splica. “E conseho di ministernan di Reino lo depende fuertemente riba e conseho di CAft pa su decision.”

Te awor Aruba ta mustra cu e ta baha e deficit riba su presupuestonan. Sinembargo ainda tin deficit cual ta causa cu e debe nacional ta creciendo. Aruba por fia mas barata pa cubri e debe aki por medio di Hulanda bou condicion cu ta baha e debe nacional. CAft su ultimo rapport ta critica e calculacionnan cu gobierno a haci pa yega na su presupuesto 2017. Nan ta mucho positivo cu e riesgo cu gobierno no ta bay logra di yega na e deficit proponi, pues ta sali mas halto.