Ministro ta cuminsa un guera cu fundacion SABA tocante nan maneho, mientras e no ta desaroya e instrumentonan pa supervisa tur institucion cu ta duna cuido na anciano, y otro categoria di cuido. Apenas na december 2015 den e editorial aki nos a yama bonbini na un ley aproba den Parlamento poco dia prome, cu ta encera e supervision riba tur institucion cu ta duna cuido na hende di edad y otronan cu mester di cuido pa via di nan condicion. E ley aki, yama Landsverordening Verzorgingshuizen a keda aproba, despues di un caminda largo di preparacion di varios aña.
No ta straño cu e ley aki ta abarca tur e instrumentonan di supervision cu gobierno por desea. Bao di un sistema di permiso (vergunningstelsel) pa opera por ehemplo un cas di anciano, ta cay regla encuanto maneho di e institucion, su personal y exigencianan pa loke ta educacion y experiencia pa tur diferente tipo di trabao, e set up di e luga mes, su accesibilidad y siguridad, e actuacion corecto di e institucion como bon dunado di trabao, siguridad encuanto candela, garantia pa cu higiena y prevencion di riesgo di enfermedad.
Naturalmente nos ta comprende cu den e par di luna despues di e aprobacion no por tin tur cos prepara pa implementa e ley. Manera nos a bisa den nos editorial na december, e ley aki ta un ‘ley cuadro’, un ‘kaderwet’ cu mester di e stipulacion di e reglanan mas den detaye, hinca den un decreto general (landsbesluit houdende algemene maatregelen). Pa por desaroya e reglanan mas detaya ta indispensabel colabora cu e autoridadnan concerni, e directivanan di e institucionnan y nan personal, pa yega na regla cu ta cuadra cu e realidad den cual e institucionnan aki ta opera.
Tambe e ley aki ta exigi cu ta percura pa un inspeccion di salubridad publico, ya cu tin tarea pa esaki encera den e ley aki. Tambe e ley den su detayenan lo haci necesario pa haci un revision completo di e situacion den tur cas di anciano y si acaso necesario lo mester inverti den mehora e condicionnan den e instalacionnan actual. Si acaso tin di nan cu ta exigi demasiado inversion pa mehora, e resultado por hasta ta cu lo mester traha facilidad nobo. Ta tarea primordial di e mandatario di turno pa percura pa e instrumentonan di control y supervision keda desaroya. Cu e mester tempo y colaboracion pa esaki, esey ta perfectamente comprendibel.
Loke no ta comprendibel ta cu e ministro ta hiba e asunto den un direccion completamente contrario, unda e ta desea di implementa un maneho di supervision directo poniendo hende di su confiansa den e fundacionnan mes! Net e aspecto aki no ta ni aparece den e ley, pasobra e ley ta basa riba crea e instrumentonan di control medico, di cuido, pero tambe financiero, sin cu gobernacion mester bay planta ‘watchdog’ den cada institucion cu ta pidi y por haya un permiso pa opera un cas di cuido. No mester lubida cu e ley no ta traha solamente pa e situacion actual unda parti grandi ta cay bao di SABA, pero ta traha pa futuro unda por tin hopi mas institucion cu mester opera bao di e ley aki y cu lo ta someti na un permiso, cu ta trece un cantidad di obligacion cu cual nan mester cumpli. No cumplimento a lo largo por hiba na perde e permiso y lo causa ceramento di e institucion. E ley aki ta na vigor tambe pa e casnan existente caba, cu mester pidi un permiso bao di e ley aki.
Cu tur esaki na caminda, y dependiendo di e iniciativa y rapidez di gobernacion mes pa implementa e ley aki, nos ta presencia un conflicto entre ministro y e fundacion mas grandi den cuido, tocante un cantidad di cos cu no mester ta causa di conflicto mas. Si ta bin reglamentacion di e funcionnan den e sector di cuido aki, no mester laga Departamento di Recurso Humano (DRH) duplica trabao cu e fundacion mes mester haci como dunado di trabao. O acaso ta e intencion cu mas oro DRH mester supervisa delaster un trahado den e sector aki, hasta cerca e otro casnan cu ta traha riba un base comercial? Loke e ley aki, cu a cuminsa como proyecto prome cu e ministro aki a drenta, pero ta e a firme, ta regla hustamente cu gobierno por mantene distancia y sinembargo maneha e sector na un manera efectivo. Ademas gobierno tin e instrumento di subsidio, cu ta trece cun’e exigencianan pa administracion financiero adecua y reportahe na gobierno manera e reglanan di e area specifico ey ta stipula. Esey mester ta suficiente.
Pa colmo, mayoria di e problemanan actual ta di gobierno. E paviljoen cu tin mester di mantenemento ta di gobierno, kende lo mester drecha esey. E problemanan di trahado ta pega na DRH y no na SABA. Si mañan e ministro lanta su mes fundacion, manera ta su deseo, e mester bay atende e mesun problemanan cu tin awor riba tayo di SABA!
