E ultimo fase cu tabata resta di e proceso di independisacion di cuerpo di duana como un departamento ariba su mes a keda concretisa finalmente.
Minister di Financia, Angel Bermudez encarga cu e departamento di Aduana ta bisa Bon Dia Aruba cu basicamente nan a finalisa e proceso di structura di salario y funcion di e empleadonan di duana. Nan a yega na un formacion di loke ta wordo yama formatiehuis y salarishuis.
Cuerpo di duana ta uno specifico y ta distingui fei di otro departamentonan cu tin. Mas bien nan ta pertenece na otro grupo uniforma, manera polis, cuidado di preso, Warda Costa, etc… ya cu nan ta cuerpo autorisa pa carga arma. P’esey nan mester haya un formatiehuis, caminda tur funcion ta wordo prescribi exactamente, entre nan kico ta nan trabou, nan obligacionnan, etc… manera e mandatario ta splica.
Igualmente mirando e trabou specifico entre otro e coremento di warda, etc… henter e sistema di salario a keda delinea tambe. Nan a entama esaki basicamente teniendo na cuenta esun di cuerpo policial, ya esaki a keda cumbini y nan ta cla cu esaki tambe.
Ley
E siguiente paso ta pa e structura bay conseho di minister pa aprobacion. Despues esaki ta wordo formalisa den un Landsbesluit (ley). E cambionan aki ta drenta na vigor entrante 2018. Pero e partidonan lo sigui papia con e organisacion interno di e cuerpo di aduana mester ta pa nan formalisa esey pa medio di nos sistema legal.
E mandatario ta laga sa cu esaki so tabata falta despues cu na aña 2013 henter e departamento di impuesto (SIAD) a wordo reforma. Creando dos departamento sempara un fei otro cu ta departamento di Impuesto (SIA) y departamento di Aduana.
