Aruba, un isla chikito cu un poblacion di alrededor di 110 mil habitante a bira un comunidad di gamblemento. Ademas di e diferente casino cu ta opera riba nos isla y diferente bingo, rifa, loteria, catochi y lotto ta wordo bendi tur dia, ya sea di forma legal contribuyendo cu caha di gobierno pa inverti den deporte of tambe den forma ilegal.
Gamblemento y problema social
Alrededor di 4 mil persona ta desemplea y un 70% di nos poblacion laboral ta gana un salario minimo cual no ta alcansa pa atende debidamente cu gastonan basico. E preocupacion ta surgi si nos ta sigui stimula e gamblemento aki, ya cu e speransa di e hendenan pa gana algo den gamblemento ta haci cu e negoshi aki ta bira uno lucrativo. Gobierno ta calcula cu benta ilegal di catochi ta produci alrededor di 20 pa 30 miyon florin, sin paga belasting. Pues e sociedad di gamblemento aki ta sigui aumenta y stimula cu mas lotto, rifa, bingo, catochi, y mas weganan.
Minister Alex Schwengle ta haya cu e ta un punto cu ta merece su debido atencion, considerando cu tin un ‘Ley di Loteria’ cu lo regarda y regula e actividad aki; e ley no ta den lachi sino ariba mesa pa wordo trata den parlamento. El a bisa cu e topico aki di tanto gamblemento riba nos isla tin nan debido atencion y nan ta bay atende cu ne tambe.
Segun e mandatario, na tur pais cu tin loterianan legal y cu ta aporta na comunidad, bo mester haci un investigacion regularmente. E tipo di investigacion aki ta determina kico lotto ta haci tambe y si tin consecuencianan negativo. E tipo di investigacion aki nunca a wordo haci na Aruba. “E por tin consecuencianan negativo”, el a bisa.
E mandatario a yega di papia cu Lotto Pa Deporte te hasta cu CBS (Oficina Central di Estadistica), ya cu e ta un exigencia di su ministerio cu ainda no a wordo ehecuta, pero cu e lo habri luga pa bin cu e investigacion aki. E mandatario a laga sa cu nan kier pa Lotto pa Deporte bay zorg pa paga un instancia independiente, pa ehempel via Universidad di Aruba pa haci un analisis di efectonan positivo pero tambe negativo di gamblemento.
Si tin cosnan negativo mester atende cu esey tambe, segun minister Schwengle. Den caso di Lotto pa Deporte cu ta aporta na comunidad, nan mester haci e contribucion aki na un manera responsabel.
Lotto pa Deporte
Di su banda presidente di e board di Lotto pa Deporte, Di-Stefano Wernet a laga sa cu a pesar cu nan ta ofrece un diversidad di producto pa brinda e posibilidad di gana algo extra, pero esaki mester bay segun bo forsa financiero.
“Bo no mester forsa bo cartera. Pero cumpra si pasobra na final di dia e cen ta bay pa deporte”, sr. Wernet a declara. Fundacion Lotto pa Deporte kier sigui crece cu mas productonan innovativo y ya caba el a anuncia cu lo tin mas na caminda. P’esey ta bira urgente pa bin cu un investigacion obhetivo di un instancia imparcial pa determina e efectonan cu tanto producto di gamblemento tin den nos comunidad chikito.
