Catochi y aporte na deporte… ken kier obliga kico, y con?

Cu cierto asombro nos por a tuma nota di e opinion di e mandatario encarga cu deporte, cu e otro empresanan cu ta explota e gana di nos pueblo pa hunga placa, no ta contribuyendo na deporte, di nan beneficionan. Wel, asina leu cu nos sa, niun di nan no ta un fundacion cu meta caritativo, pero ta empresa dedica na ganashi pa nan mes.

Nos ta papia aki di empresa, cu ta haci uzo di e espacio legal cu gobierno(nan) a tolera durante varios decada. Si gobierno(nan) tabata haya o ta haya actualmente, cu mester cera e espacio pa empresa priva haci uzo di e oportunidad pa opera como negoshi den e sector aki, esey ta na nan pa dicidi. Por algo cera si, cu durante tur e añanan cu a pasa, ningun gobierno a haya necesario pa limita e espacio ey, creando asina mas espacio pa su mes weganan di suerte via e fundacion (gubernamental) Lotto pa Deporte. Nos por conclui anto cu gobierno(nan) a bay di acuerdo cu e espacio comercial pa loteria unda esun oficialisa den Lotto pa Deporte lo mester competi cu loterianan comercial, dunando nan ‘de facto’ derecho di existencia. Awor, Lotto pa Deporte cu tin como meta explicito di subsidia deporte, aparentemente ta yega na dedica 20% di su beneficionan na deporte? Of 20% di su benta total? For di e diferente interpretacionnan cu por saca for di publicacion den diferente medio di comunicacion, no por haya claridad di kico nos ta papiando aki. Naturalmente esey tin un remedi general cu nos ta recomenda den otro asunto tambe: e yama ‘transparencia’!

Pakico nos por mester sigui acepta cu cada tanto tempo un mandatario ta bin sinta critica tal o cual situacion, manera den e caso aki e manera di opera di e empresanan comercial di wega di placa, sin cu ta duna nos un claridad riba operacion cu e empresa gubernamental ta maneha aña den, aña afo. Con nos por husga si 20% ta hopi of tiki, si mescos cu tanto otro operacion gubernamental, Lotto pa Deporte tambe ta un misterio grandi pa nos como ciudadano. Fuera di e rapportnan di accountant cu nunca nos no mag mira, por haci e pregunta tambe ta ki dia Algemene Rekenkamer ta lanta for di soño y bay haci un investigacion,manera ley ta stipula, encuanto e ‘doelmatigheid’ y ‘rechtmatigheid’ di su explotacion y uzo di recursonan di e fundacion. Pakico nos ta bisa esaki? Un ehemplo: den pasado a yega di sucede cu Comite Olimpico a yega di haya, despues di hopi aña sin subsidio di gobierno, Afl. 100.000 destina na paga ticket pa un delegacion deportivo na un di e weganan regional. Inmediatamente despues Comite Olimpico a ser yama ‘op het matje’ na Rekenkamer pa duna cuenta ta kico a haci cu e placa. A proba cu documento den man cu a gasta e placa cumprando ticket di avion, segun e peticion haci. So far, so good. Pero a puntra Rekenkamer tambe ki dia nan ta invita Lotto pa Deporte pa pasa duna cuenta di kico nan ta haci cu placa, siendo nan tabatin e tempo ey un ‘omzet’ di alrededor di 40 miyon florin pa aña… Rekenkamer a keda debe e Comite un contesta te awe. Asina ta para cu e dunamento di cuenta di instancianan liga na gobernacion…

Pa colmo, e mandatario ta hasta conta cu na Canada e compania cu tin un contract cu e fundacion pa maneho di e weganan ‘a habri tur nan bukinan’. Bunita, cu mas rason ainda nos lo bisa: habri e bukinan pa nos como ciudadano, pa nos por mira ‘unda nos placa ta bay’. E gobierno di turno no tin un bunita lema cu ta bisa net esey? O transparencia ta conta pa otronan so?

Pa bolbe un rato na e situacion particular di e fundacion di lotto; ta conoci cu e espacio financiero a keda bastante comprometi pa e debenan a largo plaso pa paga pa e instalacionnan deportivo crea den añanan anterior. Esaki ta trece cu ne cu e espacio financiero pa realmente duna un sosten fuerte na trabao di e federacionnan ta keda limita. Busca e placa cerca e companianan di loteria, a base di propio boluntad no ta parce nos un oferta asina fuerte. Nos no conoce nan situacion financiero tampoco, pero 20% di ganashi o di benta, den ambos caso ta hopi placa. E alternativa ta pa obliga nan cumpli via ley cu esaki, si e caminda ta consehabel legalmente; lo mester studia esey.

Finalmente, kico ta nos critica principal den e caso aki? Cu e ministro ta busca un forma di yega na mas placa pa deporte? No, esey nos ta apoya sin mas, hasta nos ta kere cu hopi mas placa mester bay pa deporte, como un di e alternativanan sano pa lanta un hubentud den condicion mas faborabel, tumando na cuenta crecemento di delincuencia hubenil. Loke nos ta contra ta pa conta nos menos di mita di e storia anto ta desea di gana simpatia pa e idea cu en principio ta bon. Mensahe simpel y cortico: pone tur e cartanan (bukinan) riba mesa anto nos ta sigui papia.