Trahadonan di Mantenemento di La Cabana lo tin referendum diaranson awor

Aña 2016 a inicia un poco slow pa loke ta e celebracion di referendum y te hasta firma di contracto colectivo (CAO). 

Otro siman  lo wordo celebra un referendum cu a wordo pidi pa e trahadonan di departamento di Mantenemento di La Cabana. Mediador di Gobierno sr. Anselmo Pontilius a declara na Bon Dia Aruba cu nan a reuni cu gerencia di e hotel  caba, y nan a informa tanto na e gerencia como na e sindicato cu tur cos ta na ordo pa celebra e referendum riba di 9 di maart.

Esun di La Cabana lo ta e prome referendum pa 2016. Sr. Pontilius a bisa cu otro peticion a drenta pa un referendum pero el a abstene di bisa na unda, ya cu nan tin cu wak e proceso ainda.

Negociacion CAO

Na e momento aki, cerca Mediador di Gobierno tin un solo peticion y nan ta papiando cu sindicato STA y e compania ATA pa loke ta negociacion di CAO. Ambos parti a considera necesario pa pidi oficina di Mediador di Gobierno pa bin yuda den e negociacion aki.  E  prome CAO como ATA riba su mes a wordo firma tres aña pasa y Mediador tambe a participa den dje. Pues esaki ta e di dos CAO  di ATA independiente y –segun sr. Pontilius- e negociacion ta andando. Ya caba nan a tin casi 5 sesion.

E recomendacion di Mediador di Gobierno ta pa e partidonan no discuti un cantidad di punto cu lo tene leu fei di otro. Sino pa ambos parti concentra ariba puntonan principal. “Cuater pa cinco puntonan ta ideal”, el a bisa.

E compania tin deseo pa firma un CAO di cuater aña, mientras cu e sindicato STA ta prefera tres aña. E ta un diferencia normal, segun sr. Pontilius. Tambe otro diferencia normal tin di haber cu e contenido financiero ya sea aumento directo di salario y tambe aumento indirecto di salario cu beneficionan financiero.

Haciendo un analisis riba e lista di CAO cu mester wordo negosha e aña aki, FTA tin esun di mas hopi, pero no asina tanto manera un aña prome.  Ta logico semper lo tin mas posibilidad di firma di CAO cu lo bin acerca. Na aña 2015, tanto sindicato STA como FTA ta esunnan cu mas a negosha CAO. Sindicato SEPPA ta sigui esun di tres luga, y nan tres e tres organisacion sindical cu mas CAO a firma aña pasa.

Mediador di Gobierno a bisa cu e negociacionnan di CAO cu nan sa cu ta tumando luga Cu FTA, sin cu tin presencia di Mediador di Gobierno, ta varios. Un proceso grandi di negociacion di CAO ta esun di STA cu aeropuerto (Tripel A). Mediador di Gobierno ta compronde cu ambos parti ta hopi leu y e sindicatonan lo presenta e contenido di loke a wordo negocia dilanti su miembronan.

Mediador di Gobierno ta recomenda e trahadonan pa medio di su sindicato y e dunado di trabou, percura pa nan mes profundisa den nan negociacion. Kiermen cu ora cu nan ta yega bati porta di Mediador di Gobierno ta pasobra nan mes a sinti cu nan a pega totalmente.