Gobierno ta viola ley encuanto salario minimo

Nos ta casi custumbra caba cu den tanto caso e gobierno aki ta djis pone ley un banda. E biaha aki pa duna e trahadonan menos bon paga un extra riba nan salario, cu eleccion den porta. E momento ta bon scogi, pasobra ningun di nan contrincantenan politico ta bay corta nan dede mustrando riba e actuacion ilegal di e actual gabinete. Como medio di comunicacion, sin embargo, nos no tin voto pa perde… Nos ta tende e comentario caba di esunnan politicamente liga, cu ‘boso mester tin algo contra e persona humilde’. Esey no ta e caso, pero nos kier ta parti di un sociedad ordena, unda na prome luga mester tuma medida (o paso, si ‘medida’ ta zona demasiado fuerte), na un manera corecto, tumando na cuenta tur aspecto, y na prome luga, ley. Kico no ta bon haci anto?

Pa cuminsa, e aumento a keda introduci na un manera ilegal. Segun e ley di salario minimo, no ta posibel pa tuma decision pa aumenta salario sin conseho di Conseho Social Economico (SER). Nos tin confirmacion cu SER no a haya peticion nobo pa conseha riba e aumento actual. SER a traha conseho riba peticion pa un eventual aumento na januari 2017. E conseho tabata negativo y gobierno no a introduci ningun aumento. Awor, den cayente di campaña, ta duna aumento, sin conseho di SER, ya cu e conseho duna na november 2016 tabata riba peticion explicito di ministro encarga cu asunto social (y labor) encuanto eventual aumento pa 1 di januari 2017. Si acaso a pidi un conseho nobo, nada lo a cambia pasobra nada no a cambia den e situacion socioeconomico di november pa awe.

Ademas e medida ta na vigor entrante 1 di augustus; awe ta dia 10. Algo cu no por, pasobra bo no por introduci algo cu ta na desbentaha di e partido perhudica, e dunado di trabao, di manera retroactivo. Si tin algun instancia cu ta desea di bay corte cu e decision aki, nos ta duda. En todo caso ta recomendabel cu esun cu hacie, preferiblemente tin un parti substancial di su empleadonan ganando salario minimo, pa por proba sigur un interes genuino den demanda pa perhuicio.

Di tur manera gobierno ta garando tur empresa di sorpresa, ya cu nan mester bay revisa tur nan planificacion di payroll. Pero bueno, dunado di trabao semper ta representa menos voto cu empleado, asina ta cu, segun logica di politica den un aña di eleccion, no ta pone tanto atencion na loke dunado di trabao ta desea. Un parti di nan di tur manera lo no keda sin duna e cheque, sigur si nan tin fabor di haya, si e gobierno aki sinta atrobe pa e proximo periodo di gobernacion.

Pero, con grandi e aumento di 2% ta pa sector priva? Cuanto en realidad nan payroll ta aumenta? Ban tuma e ehemplo di un persona cu salario minimo. Riba papel ta parce un aumento di Afl. 33,55 pa luna, pero nos ta lubida e gastonan como dunado di trabao, cu mester añadi e gastonan extra. Manera AZV, AOV/AWW, pension obligatorio pa sector priva. Ban bisa cu e aumento di gasto total ta yega na Afl. 40 pa luna. No ta parce tanto riba su mes, pero esaki no ta unico preocupacion di un empresario. E tin persona cu ta gana 1800, 1900, 2000, 2400 pa luna. E fenomeno cu ta mira tur caminda, no na Aruba so, cu despues ta bin presion pa aumenta e salarionan di esunnan un poco mas halto cu e limite di salario minimo. E ahustacion aki den henter e structura di salario tin consecuencia serio pa gasto total di payroll. Banda di esey mester considera e situacion economico di e momento aki. Aruba ta den e tercer aña di recesion economico: crecemento economico real na 2015 tabata -0,5%; na 2016 -0,2% y ta parce di ta sigui e aña aki den mesun rumbo.

Y nos no mester lubida un factor hopi importante: di unda e inflacion negativo di ultimo añanan ta bin? Entre otro, di comercio cu ta baha prijs, de paso bahando rentabilidad di negoshi, pa haya capta nan parti di e poder di compra stanca. Den un situacion asina, e ministro encarga cu labor ta haci cos realmente contradictorio. Di un banda e ta aumenta salario minimo den tempo di guera pa comercio, y di otro banda ta organisa evento pa yuda hende haya trabao. Aparentemente te awe den gobernacion nan no kier comprende cu cupo di trabao no ta nace ora gobierno ta tene evento bunita, pero ta surgi ora comercio ta mira oportunidad real pa un negoshi, pa gana placa, paga impuesto, y paga empleado, cu tur obligacion cu ley ta prescribi.

E medida tuma awor no ta haci nada mas cu aumenta gasto empresarial na un momento cu ya tin tanto empresa cu ta tambaliando, haciendo un gran esfuerso pa mantene cabes riba awa, incluyendo e payroll actual. Pero e efectonan pa empleo lo bira visibel despues di eleccion. ‘Wie dan leeft, die dan zorgt’ (‘Esun cu t’ey, su cuenta’), ta parce e lema di momento.