Un serie di promocion y oferta cu a ser publica riba rednan social y cu tabata dirigi na hende sin documento di estadia of residencia legal na Merca, a ser revela como un trampa pa hende inmigrante. E promocion tabata priminti un koffi gratis na cadena di Starbucks pa hende indocumenta. Empresa Starbucks a informa cu su participacion den e campaña aki tabata falso.
Via Twitter varios cuenta tabata anuncia, cu un poster cu tabata traha cu un sorto di letra y estilo di tienda di Starbucks, un dia special dedica na inmigrantenan, caminda nan lo a haya un descuento of un bebida gratis, riba su dia special.
Segun autor di e engaño nan a usa un ironia, pasobra e codigo pa usa den e promocion aki tabata ICE. Palabra ICE ta nifica ijs, pero ta nifica tambe Servicio di Inmigracion y Control di Aduana di Merca, cu su abreviatura na Ingles ICE. ICE ta e agencia di Merca cu ta designa pa deportacion di inmigrante sin papel legal.
E origen di e campaña falso por a sali for di e foro 4chan, caminda un usuario a sugeri pa crea un “meme” of joke di un posibel “dia di inmigrante indocumenta”, riba dia 11, pa motibo cu number 11 ta parce e abreviatura II. “ Boso por bisa algun lugar liberal, caminda tur hende ilegal por bay y pidi nan cos gratis”, e cuenta anonimo a skirbi riba red social. Starbucks ta un empresa hopi conoci pa su apoyo pa iniciativa progresista, y el a ser eligi como obhetivo. E campaña falso a bira conoci cu masha velocidad riba rednan social, y pa tal motibo e empresa mester a sali lihe, pa duna claridad den e situacion aki. “E campaña aki ta falso. Starbucks no ta apoya ningun evento manera esaki. Por fabor, no publica informacion falso,”, gerencia di Starbucks a splica como un respuesta riba e topico aki.
E lucha contra inmigracion ilegal ta un di caracteristicanan mas importante di e gobierno di Donald Trump, cu a purba di cancela varios beneficio federal pa ciudadnan di Merca cu no ta colabora cu gobierno federal den proceso di detencion y deportacion di inmigrante cu ta na Merca sin autorisacion.
Gobierno a priminti pa traha un amienda riba e sistema di inmigracion legal, cu e argumento cu inmigrante ta competi cu ciudadano Mericano, pa haya trabao y e situacion aki ta afecta e salario na algun ciudad di Merca.
