Mester cuminsa separa ‘fact from fiction’

Den e recta final di e campaña electoral mas cu nunca lo ta importante pa separa ‘fact from fiction’: distingui kico ta berdad y kico no. Pa por duna guia na opinion publico, ta importante cu nos ta mantene esaki como nos orientacion den nos publicacionnan.

Ya caba e bataya encuanto e trasfondo y origen di e debe astronomico cu nos a acumula den 31 aña a inicia atrobe, den cual ambos banda ta publica loke nan ta haya cu ta corecto. Motibo pa cual nos lo ta haciendo, y pa un parti a haci caba, nos propio investigacion, y lo tuma esey como punto di salida. A base di e cifranan generalmente acepta di Banco Central, manera publica den su Annual Statistical Digest 2015, y pa loke ta ultimo cifra di fin di 2016 den su publicacion Statistical Tables Government Sector 4th Quarter 2016, nos ta yega na e siguiente conclusion: 68.9% di e debe acumula pa fin di 2016 tabata durante gobernacion di AVP, cu of sin partner di coalicion. E restante 31.1% a bin acerca durante gobernacion di MEP, cu of sin partner di coalicion. Durante e gobernacion di ocho aña su so (2001 – 2009), MEP a percura pa Afl. 725.4 miyon di aumento di debe. Den e ultimo shete aña, gobierno solitario di AVP a percura pa un aumento di Afl. 1888.9 miyon. Pa completa e panorama, e cifranan total. Durante nan gobernacion partido MEP tabata (co-)responsabel pa Afl. 1277.2 miyon. Gobierno pa cual AVP tabata (co-)responsabel a percura pa Afl. 2841.8 miyon di placa fia.

Pa loke ta e debe extra di e proyectonan ‘PPP’ nos mester splica un poco ya cu ta materia mas complica. Esey pasobra den e caso aki nos mester haci un separacion entre capital fia y interes. Den hopi di e publicacionnan ta menciona un suma anual cu mester paga pa un cierto cantidad di aña, cu ademas ta varia pa cada proyecto. Nos ta keda debe nos lectornan por lo pronto un ‘breakdown’ completo di loke ta capital fia, kico ta interes y tambe kico ta cobranza pa mantenemento di e proyecto, sea cu ta caretera, edificio, o Puerto. Tur esaki ta hinca den e suma total cu e compania cu ta realisa e proyecto. E suma total aki, di tur proyecto hunto ta loke nos mester bay paga via un suma anual, ora tur proyecto ta cla. Ta papia aki di un suma di entre 90 pa 100 miyon florin pa aña, pa por lo menos 20 aña. En total anto un suma cu por surpasa 2000 miyon florin. Si nos tuma un suma conservador como e capital fia mes, esaki lo por ta entre 600 pa 700 miyon. Esaki caba lo ta pone e debe total actual di gobierno na alrededor di Afl. 4800 miyon. Mientras tanto nos GDP fin di 2016 no a yega na Afl. 4800 miyon. Debe real ta net riba 100% di GDP anto…

No ta solamente cu e sumanan ta astronomico, pero e hecho cu nos a yega na e limite di loke nos por fia, ta haci cu e siguiente gobierno no tin espacio pa fia mas. Segun CAFT Aruba a surpasa e limite di loke ta aceptabel pa financia como PPP, ya cu e peso anual riba presupuesto a bira mas cu por soporta. Si nos tuma como punto di salida casi 100 miyon di pago riba PPP, mas e 230 miyon florin cu actualmente nos ta pagando na interes, nos ta papiando aki di como un cuarto parti di presupuesto ta mara cu e pagonan aki. Placa cu por a uza pa otro asunto urgente, manera mehoracion di enseñansa y salubridad publico. Cu esaki, manera nos a bisa na varios ocasion caba, e posibilidadnan pa cualkier gobierno despues di eleccion ta sumamente limita. Crea espacio financiero ta significa baha gasto den otro parti di presupuesto, loke ta tuma tempo y lo haya resistencia tambe. Un di e batayanan cu ta bay tuma luga ta e problema di indexering pa e funcionarionan publico y otro asalariado paga pa gobierno. Den e añanan cu ta bin gobierno tin e compromiso pa paga e aumentonan palabra na 2014, cu ta core te 2024. E pregunta grandi lo ta con gobierno, cualkier gobierno, ta bay dedica placa cu awor no t’ey, pa paga indexering, mientras cu e tarea ta net pa baha gasto di payroll. Nos ta tende di diferente banda cu e sindicatonan ta keto y pa un parti nos por comprende esey. E sindicatonan cu ta representa empleado publico no tin ningun intencion di ‘rock the boat’ awor, pero lo warda trankil pa negocia despues cu esun cu mester bay goberna. Den esaki, basicamente Aruba ta para na mes luga cu tanto aña pasa: no tin espacio financiero, sindicatonan lo bin cu exigencia, y loke ningun di e partidonan na mesa kier mira y reconoce, ta cu e espacio lo mester bin for di un restructuracion drastico di e aparato gubernamental. Awor caba nos ta tende cu tur hende kier mehora situacion, sin mishi cu nada… Niun hende kier bisa e cos manera e ta?