SPD: “No por descarta e parti di remedi pa cuido mental”

Hefe na Sociaal Psychiatrische Dienst (SPD) Rafael Lopez ta conta nos cu 180 di nan pashent ta sufri di psicosis cronico. E departamento ta enfatisa cu por limita e uzo pero no por laga afo e parti di remedi ora ta trata cuido mental.

Manera cu Bon Dia a publica algun siman atras, SPD tin 330 pashent cronico registra cu ta sufri di salud mental. Nan a laga sa cu den un aña nan por haya 150 te cu 250 pashent cu ta bin pa un tratamento mas cortico. Prome cu nos combersacion cu sr. Lopez di SPD, nos a sinta cu psicologo Dimitri Halley riba e tema di salud mental y segun sr. Halley, demasiado medicamento no ta yudando pa resolve e problema. E psicologo a menciona cu un psikiatra no tin suficiente training pa trata cu problemanan psicologico, subrayando tambe cu falta atencion riba e parti aki. Pero un psicologo no ta educa pa traha cu remedi cual segun SPD ta un parti cu bo no por laga afo den e tipo di cuido aki.

Psicosis cronico
E pashentnan cronico ta wordo trata na nan mesun cas. Sr. Lopez ta elabora: “Den nos caso den psikiatria nos tin cu uza tanto e parti di psicologia como e parti di medicina. Unabes cu bo ta uza e medicina bo ta compronde cu e ta un parti cu bo mester di dje.” E psikiatra ta bisa nos cu bo por duna un persona psicotico ki tipo di terapia riba e parti di psicologia cu bo kier, pero si e ta psicotico e ta bay keda asina. “E unico manera pa saca e persona di psicosis of stabilis’e ta pa motibo di dun’e remedi.” Den casonan cronico, sr. Lopez ta bisa nos cu mester sigui cu medicamento cronico pasobra na momento cu stop cu esaki, e persona ta haya un recaida mental/emocional. Cifranan di SPD ta indica cu 60% di nan clientenan ta sufri di schizophrenia/psicosis cronico pa probablemente henter nan bida. Den esaki, 80% di e pashentnan cu psicosis cronico ta tipo ‘paranoica’. “Nos no por bay tuma e risico di laga 180 persona cu ta sufri di paranoica riba caya. E unico manera pa bo calma esey ta pa via di e remedi. “

Efectonan secundario di remedi
Sr. Lopez ta conta nos cu e tipo di medicina cu nan tabata uza den pasado tabata tin efectonan riba termino largo. P’esey e departamento ta informa cu nan ta purba aworaki di mantene e dosis hopi mas abao compara cu un dies aña of mas atras. “Nos tabata uza dosis di por ehempel 1000mg pa luna anto aworaki ta purba mantene entre 300 cu 500mg maximo. Tabata tin personanan den pasado cu lo haya 2000mg pasobra no tabata tin niun medio mas pa bo por tene e hendenan aki trankil na cas. Mientras aworaki bo ta uza hopi biaha mas e parti di psicologia unda ta guia e famia tambe, cual ta yuda baha e uzo di remedi un poco,” segun sr. Lopez. Aworaki tin remedinan mas nobo cual ta mas caro tambe segun SPD. E remedinan nobo aki tin hopi menos efectonan secundario riba termino largo segun sr. Lopez.

30 aña bao medicamento
Sr. Lopez ta conta nos cu nan tin algun pashent cu ta funciona bon bao medicamento pa 30 te cu 40 aña cu ta hasta keda labora na nan trabao. “Mi tin hende cu for di dia cu mi a yega aki nan ta den psikiatria. Nan a uza e mesun dosis di remedi y bin cu esaki te aworaki. Nunca nan no kier a cambia, aunke cu bo bisa nan cu e remedinan nobo ta mas miho nan a keda funciona bon te na bira pensionado.”

Cooperacion cu famia
SPD ta haya hopi caso cu famianan desespera cu hopi biaha ta nenga di tuma e remedi pa e pashent. Sr. Lopez: “Hopi biaha bo no ta haya e mesun cooperacion di e famia cu e propuestanan cu abo ta presenta na nan. Berdad hopi biaha e ta keda dificil, aceptacion ta keda un di e desafionan di mas grandi cu nos tin. Cu tanto e famia of persona no ta acepta cu e ta malo y mester di cierto tratamento.” E ta sigui bisa: “Tin caso cu ni unda nos manda e pashent nos no por yud’e. Nos no por yuda tur hende nunca anto tin caso unda un persona mester wordo interna den un clinica specialisa pa e persona ey. Te ainda un hospital pa psikiatrico no tin na Aruba.
Paaz ta keda Paaz, e no ta un hospital psikiatrico.” E psikiatra ta bisa cu den tur tipo di enfermedad ta pasa cu casonan tin mester di cuido specialisa den exterior. Aña pasa SPD a hiba un pashent na exterior anto e aña aki a bolbe hiba un otro. Nan ta hiba nan pa entre otro Colombia, Hulanda y ta purba limita e casonan aki cu tin cu bay afo.

Curatela
E departamento ta haci uzo tambe awo di e Centro di Motivacion na KIA. E no ta un luga psikiatrico pero pa falta di luga ta haci uzo di dje pa interna un hende ora ta necesario, segun sr. Lopez ta splica Bon Dia. Eynan e pashent ta keda pa cinco siman. Pa bo bay bao e proceso aki di curatela bo tin cu bay via di hues cual ta un proceso hopi largo segun sr. Lopez. E pashent por keda interna bao curatela eynan te cu un aña pa despues busca un otro recurso pe pafo di esaki y mas economico.

Sr. Lopez ta splica cu aworaki Colombia ta un recurso cu ta sali hopi mas barata pa interna e pashentnan aki. “Den un banda bo ta pensa si e ta humano pa manda un hende afo. Paso bo ta separa esaki completamente for di su famia y sistema pa pone den un idioma y cultura completamente otro. Mi sa cu tin casonan cu ta hopi mas complica y hopi biaha famianan kier un solucion mesora, anto nos no tin esaki. Pero cada caso nos ta purba di haci e mas miho cu nos por.” Sr. Lopez ta conclui cu por ta di 500 caso cu nan tin den un aña, bo ta alivia hopi di nan. Pero semper tin algun caso cu bo no ta alcansa na alivia.