Ultimo cifranan di 2014…

Ultimo edicion di loke mester ta e ‘Biblia’ di tur estadistica pa Aruba, e Statistical Yearbook di CBS, ta data di aña 2014. Nos a pasa mita di 2017 mientras tanto… Mirando cu no ta parce cu lo tin un mehoracion na caminda, nos por cuminsa descarta e departamento di gobierno aki como ‘irelevante’?

E pregunta cu ta surgi ta si semper e situacion tabata asina malo. Esey no tabata e caso, pero mester tene cuenta cu durante e ultimo añanan politica a haci su entrada den e departamento. E pregunta ta te awe pakico gobierno a haya necesario pa busca un forma pa desanima trabao di e anterior director, cu tabata un di e funcionarionan publico mas respeta dentro y pafo di e aparato gubernamental, te na e punto cu el a dicidi di bandona servicio publico.

Como reemplasante e ministro di e momento ey a instala un team di tres persona (di su confianza, politico), cu segun comentario di paden y pafo di e departamento, ni hunto nan por yena e sapatonan cu e director anterior a laga atras. Y cu su salida tambe e presentacion na tempo di e Statistical Yearbook a bira un problema. Segun nos ta comprende, no tanto un problema pa produci esaki, pero mas bien pa haya e aprobacion na nivel politico pa por publica.

En todo caso nos por mira e consecuencia riba e website, unda tin un cuadro cu ‘Key figures’, cifranan ‘clave’, di cual un parti ta data di añanan atras. Kico pensa por ehemplo di e ‘GDP’ di 2011? Of e Commercial Landings na aeropuerto di 2014? Tax Revenue di gobierno, di 2014? Cifranan di turismo, manera Occupancy Rate, ADR, y RevPar di aña 2013? Mester bisa na nan fabor cu loke ta publica cu frecuencia ta e cifranan di inflacion. Pero por ta cu esey si mag pasobra e ultimo añanan inflacion ta hopi abao o hasta no existente? Pasobra esey ta algo cu gobierno por gaba cu esaki, aunke ta importante señala cu esey ta parcialmente debi na e poder adkisitivo local cu no ta mehorando.

Tur esaki tin como consecuencia cu tur esunnan cu mester haci uzo di e material estadistico aki, na practicamente tur departamento di gobierno, tur institucion semi-gubernamental, empresanan den sector priva, specialmente asesornan riba tereno economico/financiero, no tin acceso na dato cu nan mester pa nan trabao. Cu e problema di no tin cifra mas actualisa di CBS, e importancia di e unico otro instancia cu ta produci dato di indole economico y financiero, Banco Central, a bira mas grandi. E Annual Statistical Digest di BCA ta awor aki e unico fuente actualisa di informacion estadistico, cu naturalmente tin su limitacion pa loke ta e gama di topico cu e ta cubri. Al fin y al cabo, no por ta  e idea cu Banco Central mester haci trabao di CBS, pero e realidad ta bayendo den e direccion ey.

E motibo cu nos por destila for di operacion di e gabinete aki ta cu nan tin un problema cu transparencia. Pa mas cu nan grita cu nan ta pro tur e cosnan bunita cu ta describi cu palabra grandi, e echonan ta mustra diferente. E problema grandi ta cu, si e intencion ta pa no laga oposicion politico haya material estadistico den nan man pa critica gobierno, cu e mesun accion a perhudica tambe trabao di tur esunnan cu nos a menciona.

Ademas, no ta na CBS so e maneho ta di duna lo menos posibel informacion na publico. Nos ta mira e falta di transparencia den e limitacion di e trabao di Algemene Rekenkamer, cu practicamente ta haci solamente control di cuenta anual di gobierno, pero no ta haci ningun investigacion mas riba temanan di nan escogencia (liber), unda nan ta haya necesario pa haci esaki. Ta dificil pa kere cu den tur e cosnan dudoso cu nos a mira pasa den e ultimo dos periodonan di gobernacion, no tabatin ningun tema di interes? Lo ultimo cu nos ta mira menciona ta e analisis cu a haci riba e cantidad di entidad nobo cu a lanta sin cu tabatin un fundamento legal apropia pa esakinan. Den esakinan nos ta haya e servicionan ad hoc cu ta cay directamente bao di ministro presidente, sin cu tabatin un debido limitacion y demarcacion di na tareanan compara cu tareanan cu departamentonan existente tabata eherce caba. Aki ta trata por ehemplo di e Oficina di Innovacion, cu no tin un alma cu sa drechi kico nan ta produci, cu excepcion cu e directora Hulandes ta produci un articulo cada dos siman den Amigoe. Ki tempo nos por mira un Rekenkamer bon ekipa, cu por eherce tur funcion cu ta necesario den nos sistema gubernamental, y di manera independiente, sin interferencia di e nivel ministerial cu kier aproba o desaproba nan actividadnan prome cu nan a cuminsa mes.

Ora nos ta topa cu e tipo di actitud aki di un gobierno, cu aparentemente a proposito ta actua di e manera aki, strobando trabao y fluho di informacion normal riba cual e comunidad tin derecho, no ta keda otro cos cu denuncia esaki. Bij deze…