Diahuebs ultimo un denuncia formal a wordo presenta contra directora di Censo na Ministerio Publico (OM).
E denuncia aki entrega na e funcionario di OM, sra. Ann Angela a wordo presenta pa e ciudadano sr. Francisco Andres Diaz Mendoza kende ta identifica su mes como activista y investigado di Derechonan Humano y Amnistia Internacional.
Den su carta entrega na OM, e ta bisa cu directora di Censo “no ta apto” pa un cargo asina y e ta pidi pa e funcionario aki presenta su renuncia como directora di Censo inmediatamente.
Denuncia
E denuncia cu e persona aki a haci na OM tin di haber cu e caso controversial di e prome baby di aña, unda un mucha muhe di apenas 15 aña a bira e mama di e prome baby naci na Aruba na 2016.
Segun sr. Diaz Mendoza, directora di Censo no a cumpli debidamente cu su funcion pa registra di un forma diligente di un banda, e matrimonio di e mayornan di e baby y di otro banda pa registra e baby mes. Ora Bon Dia Aruba a puntra sr. Diaz Mendoza si e tin relacion familiar cu e caso aki, el a bisa cu e ta tata di criansa di e tata di e baby, y logicamente welo di e baby. Apesar cu tanto e matrimonio di e mayornan di e baby como e baby mes a keda registra oficialmente na Censo, casi tres luna despues, sr. Diaz Mendoza a dicidi di entrega un denuncia contra directora di Censo na OM.
Violacion Derecho di Mucha
Sr. Diaz Mendoza ta denuncia cu e directora di Censo a viola e articulo 7 di Derecho di Mucha di Unicef caminda ta para den su inciso 1: “E mucha mester ta inscribi inmediatamente despues di su nacemento y e lo tin derecho desde cu ta nace na un Nomber, na adkiri un nacionalidad y den e medidanan cu ta posibel, na conoce su mayornan y pa tin e cuido di nan”, asina sr. Diaz Mendoza a skirbi riba su carta dirigi na Fiscal General.
Den su carta entrega na OM, sr. Diaz Mendoza ta denuncia textualmente tambe cu “un gran cantidad di e victima cu a cay den man di e Sra. Sharin Luydens nan ta prefera di no bisa nada cerca Ministerio Publico, pasobra, nan no ta kere den e sistema hudicial di Aruba pa motibo di “Colucion”. Esaki kemen un ta tapa pa otro, un ta sconde pa otro”.
El a denuncia tambe cu directora di Censo a “scoge pa ignora un matrimonio legal cu e mayornan di e mucha (nota di redaccion: e prome baby di aña) a celebra na e pais di Venezuela”. Esaki apesar di e aclaracion di e cuerpo consular Venezolano cu a informa cu e matrimonio ta un acto legal y cu tin balor, cu tur cos ta corecto, sr. Diaz Mendoza ta señala.
Sr. Diaz Mendoza ta bisa textualmente cu: “E mucha ta e prome baby di aña y e Sra. Sharin Luydens a lage ilegal pa 6 dia sigui siendo cu su tata ta un hoben di Aruba. Sinembargo Bon Dia Aruba a trece dilanti cerca sr. Diaz Mendoza cu esaki no ta klop cu e realidad, ya cu dia 1 di januari ultimo a cay un diabierna y e tabata un dia festivo y e siguiente dianan tabata dianan liber den cuadro di ambiente festivo di inicio di aña nobo. Te dia 4 di januari actividad a cuminsa bek den aparato gubernamental, y e baby a wordo registra dia 6 di januari ultimo (segun sr. Diaz Mendoza).
E noticia aki di e prome baby di aña a lanta hopi controversia e tempo aya riba social media considerando cu e tata di e baby tabatin 27 aña y e mama apenas 15 aña.
