Ayera mainta e studiantenan conoci den boca di pueblo manera ‘bursalen’, a presenta na Aeropuerto pa asina subi avion y bay Hulanda. E studiantenan a wordo parti den 3 grupo, 2 mainta y 1 atardi. E despedida aki ta wordo coordina cada aña pa Departamento di Enseñansa conhuntamente cu Aruba Airport Authority (AAA).
E evento aki a pidi pa Aeropuerto ahusta medidanan di siguridad pa sigura un bon fluho di pasaheronan. Cada studiante tabata permiti pa ta compaña pa un persona durante e proceso di check in. Tabata un despedida emocional pa par di studiantenan y hopi di nan a wordo compaña pa nan famia y amigonan.
Segun un di e studiantenan, e por ta un situacion emocional pasobra nan ta tumando un stap basta grandi pa nan futuro. Mientras cu nan ta laga nan famia y tur cos cu nan conoce atras, e ta crea sentimentonan mixto. Tin studiante cu a expresa cu nan no tin plania pa bin bek Aruba, ya cu lo ta dificil pa nan eherce un trabou na Aruba den direccion di nan estudio. Otro studiante a expresa cu nan lo kier bolbe bek despues di un tempo toch.
Siman pasa Bon Dia Aruba a reporta cu un grupo di 20 studiante no lo a logra pa haya nan ticket pa biaha na tempo. Segun relato riba website di Departamento di Enseñansa, a logra negocia cu e agencia di biahe y aerolinea pa por haya ticket pa e studiantenan aki toch. No a specifica si nan lo a biaha riba e fecha 31 di juli. A purba tuma contacto cu e departamento pero no a logra haya contesta.
