Leynan pendiente lo wordo trata prome cu eleccion. Esaki presidente di parlamento Mervin Wyatt–Ras ta sigura.
Trabou di mantencion ta tumando luga awor den e sede di nos organo democratico principal. Presidente Wyatt–Ras ta declara na Bon Dia Aruba cu nan ta probecha e dianan di receso aki pa bin cu serie trabou di mantencion di nos organo legislativo. “Nos kier finalisa tur e puntonan ey pa nos por bay cu un clean mind cu nos por drenta tambe eleccion.”
E ta informa cu nan lo ta den receso te final di augustus. Sinembargo trabou ta wordo haci pa loke ta trata servicio na e airconan y verfmento den e edificio mes.
Pa loke ta tratamento di leynan, presidente di parlamento a declara cu nan a trata tur e leynan cu a drenta aña pasa na parlamento. Aunke tin algun di nan pendiente pa trata manera e ley pa oficialisa ortografia di Papiamento. Nan intencion ta di por bin cla cu e leynan pendiente prome cu eleccion cu ta na caminda dia 22 di september proximo.
