Presidente di STA, Diego de Cuba a declara na Bon Dia Aruba cu e situacion di e trahadonan di Serlimar ta status quo. STA no a mira mucho cambio. El a bisa cu e situacion ta mescos cu ‘e candela di dump, un rato ta subi bira grandi y despues ta baha full’.
Despues di e accion di protesta ultimo cu e trahadonan di Serlimar a realisa dilanti di Bestuurkantoor no tin mucho desaroyo mas. Tanto sindicato STA como SEPPA a reuni cu gobierno pa atende e asunto aki di ceramento di dump, caminda minister Benny Sevinger a priminti cu niun trahado lo perde trabou. Sr. de Cuba reitera cu e promesa di gobierno aki a keda; y e ta poni preto riba blanco den dos carta cu niun trahado no lo perde trabou.
Si berdaderamente ta existi un paz laboral den e compania estatal aki; el a indica cu riba e punto cu e trahadonan lo perde trabou, no tin motibo pa bay den accion mas. Sr. de Cuba a bisa cu no ta necesario pa nan saca nan miembronan; y perde un dia di trabou pa algo cu ya caba nan tin garantia pe.
Dump Nobo
Loke si STA lo trata di yega na un solucion pa locual ta un dump nobo. Y si e ta bin, ta Serlimar su hendenan mester traha riba dje. Es mas ora cu ora cu gobierno sanea esun actual na Parkietenbos, e ta bay genera mas trabou. Pero e echo ta keda si cu gobierno mester inyecta placa den Serlimar.
Sr. de Cuba a referi cu FTA a yega di grita semper pa no paga pa e recogemento di sushi di Serlimar; pero recientemente nan posicion a cambia. “Nan ta canta den tono mas abou. Nan ta bisa bay paga awor; pero paga un tarifa husto”. E ta agrega cu esaki ta algo cu STA semper a boga pe; pa bin cu un tarifa social pa esun cu ta gana salario minimo of cobra pension of onderstand. Riba e asunto aki e ta haya cu tanto Serlimar como gobierno tin un tarea pa bay haci. Pero aworaki nos ta den pleno campaña politico y nos no sa kico lo bin despues.
E ta cualifica e situacion di Serlimar como uno ‘hopi dificil’. Pasobra aworaki despues di hopi gritamento riba cantidad di dump ilegal cu ta opera rond di Aruba; finalmente gobierno a lanta fei soño, segun e lider sindical. E ta haya cu gobierno keto bay ta pega cu e problema aki; ya cu nan no ta procesando e sushi. Ademas hopi di e sushi ey no ta wordo hiba afo manera antes. El a declara cu antes tabatin barco cu tabata transporta cierto material pa recicla afo; pero awor e no ta sosodiendo mas.
E ta haya cu e sero di sushi a keda acumula locual ta demanda cu gobierno mester busca un solucion urgente. Entre otro mester bin cu un dump nobo; ya cu e situacion ariba e dump di Parkietenbos no por mas. “E ta satura caba.”
