Un trahado di e compania Forensys cu no a presenta na trabou na ora pa motibo cu e tabata mucho cansa, a haya su retiro. Sinembargo hues a dicta cu e dunado di trabou no por a kit’e pasobra el a mustra e no a haya suficiente tempo pa descansa.
E compania ta colecta prueba di accident di trafico pa seguro. E trahadonan tin warda cu ta cubri 24 ora. Riba e dia 13 di augustus 2016 e trahado mester a cuminsa traha 3’or di atardi pero el a informa via Whatsapp pa 13.45 pm e mesun dia cu e no por subi warda te 6 pm. Esaki ta pa motibo el a bisa e compania cu e mester di 11 ora di sosiego entre su wardanan segun conseho huridico. E compania a indica cu esaki tabata contra su contracto laboral. Como cu e trahado a haya basta warning tambe caba, e gerencia a dicidi cu e ultimo incumplimento tabata suficiente pa kit’e for di trabou.
Den e relato di corte nos por lesa cu e compania a tuma mas medida disciplinario (11) contra e trahado aki. Pero den su evaluacion corte ta mira cu e trahado a keha mas biaha di no haya suficiente tempo pa descansa. Anto den e periodo di menos cu 8 siman unda a tuma e medidanan contra dje, personal di Forensys incluyendo e trahado mes a busca ayudo cerca un sindicato y tabatin un referendum planea. Esaki pasobra tin mas trahado kehando di e situacion den e compania unda ta falta di trahado y asina mester traha demasiado warda sin cu ta haya tempo pa descansa.
E trahado mes a keha mas biaha tambe, indicando cu esaki ta trece peliger p’e pero tambe pa otro hende den trafico y e calidad di su trabou.
Tempo obliga pa descansa
Corte den Prome Instancia a considera cu aunke den su opinion e empresa ta uno di funcionamento continuo (volcontinu), ley ta prescribi cu un trahado den un empresa asina tin derecho riba un tempo di descanso di por lo menos 14 ora continuo si acaso su warda caba despues di 2’or di marduga. Ademas ley ta prescribi cu e tempo di descanso aki por wordo reduci unicamente un biaha den un siman na un minimo di 8 ora.
Den e siman cu e compania a kita e trahado, e tempo di descanso a wordo reduci solamente un biaha pero corte ta haya cu e trahado tabatin rason di keha. Pa motibo cu el a mustra cu su dunado di trabou a viola e ley frecuentemente den pasado. Asina corte a dicidi cu e compania no ta tabatin motibo pa dun’e su retiro.
Pa loke ta trata e ponencia di e empresa cu e falta trahado, segun corte un dunado di trabao tin cu percura pa tin suficiente personal den servicio pa asina por cumpli cu e demanda di trabao, hasta si tin personal malo of cu vakantie. Pues esaki no por ta un excuus pa pone un trahado traha di tal forma cu e no por descansa debidamente entre dos warda.
