Awe tardi e dirigentenan di sindicato STA tabatin un reunion cu gobierno pa atende cu e situacion di e chauffeur di trucknan independiente cu ta demanda un mayor participacion di trabou di parti di e compania Mota Engil encarga cu e proyecto di Watty Vos Boulevard. Sinembargo e reunion aki a keda posponi te cuminsamento di augustus venidero.

Ayera presidente di STA, Diego de Cuba a declara na Bon Dia Aruba cu a tuma nota di e ultimo desaroyo y declaracion rond di e asunto aki caminda e grupo di chauffeur y companianan a bay den accion pa expresa nan mal contento. P’esey a base di e reunion cu a tuma luga cu e delegadonan di e contratistanan y e chauffeurnan di trucknan y ekipo pisa, STA a manda un carta pa minister pa un reunion. E reunion aki tabata programa pa awe 2’or atardi, caminda STA lo a reuni cu e ministernan Benny Sevinger y Angel Bermudez, hunto cu director di DOW, Marlon Croes na edificio Cocolishi. E matutino aki a haya informacion cu aparentemente minister Sevinger mester a biaha urgentemente pa un pais bisiña; y pa tal motibo e reunion a keda posponi.

Expectativa
Sr. de Cuba ta na expectativa di kico lo sali di e reunion aki posponi pa dia 2 di augustus. Ya cu e sindicato a compronde cu nan a yega na un areglo “pero nos kier wak kico e areglo ta encera”. E sindicalista a bisa cu nan kier evita cu e situacion aki lo bolbe pasa den futuro. El a bisa cu na Aruba nos tin hendenan cu hopi experiencia den mundo di construccion di caminda manera Arubaanse Wegenbou y Albo. Tambe nan kier papia riba e cuponan di trabou cu ta bay perdi door di tipo di contracto asina cu companianan di afo.

El a trece como ehempel e prome fase di Linear Park caminda un compania di afo no a logra bin cla totalmente cu e proyecto debidamente y otro compania local mester tuma over. “E dicho di e bieunan ta berdad: Lo barato sale caro”, el a bisa. Esaki ta e advertencia cu STA kier duna gobierno den e reunion di awe pa tene cuidao, ya cu Watty Vos Boulevard ta un proyecto PPP caminda pueblo ta esun cu tin cu paga. “No ta abo como gobernante ta bay paga. Abo ta haci e debe ey pa nos como pueblo ta bay paga”, el a bisa.

E sindicalista a bisa cu pueblo semper ta dispuesto di paga si por haya un bon calidad. Sinembargo el a cuestiona e calidad di e proyecto di Green Corridor , ya cu “si bo ta core riba e caminda, e ta masha malo mes traha. Nos ta lamenta e cos ey”. P’esey como sindicato nan kier hala atencion di gobierno riba e asunto aki ya cu finalmente pueblo tin cu paga.