Pone un stop na importacion ilegal ta bon medida

E anuncio di cu porfin ta bay haci algo contra importacion di producto ilegal, mester por conta cu aprobacion amplio. Ta conoci pa hopi tempo caba, cu stranheronan ta manda nan mercancia di nan pais pa Aruba, cu barco o cu avion, ta bula bin Aruba y ta subi caya pa comercialisa nan productonan. Un di e preguntanan ta con nan ta logra ‘klaar in’ nan cosnan, si nan no por ni yega na waf of Aerocargo, sin por mustra ta kico nan ta haci na Aruba. Tabata scucha keho basta aña pasa caba, cu e hendenan aki ta logra haya acceso toch y ta saca nan mercancia riba nan mes. Esaki ya mester ta un prome punto di atencion. Ken tin acceso na tereno di waf, por ehemplo? Di e multipel kehonan cu tabatin den e ultimo añanan, desde cu e barconan chikito ta bay Barcadera, te awe no a tende di solucion contundente pa esaki.

Y mas cu un ciudadano lo tabata testigo na aeropuerto, cu e mes como Arubiano mester habri maleta y mustra tur cos, mientras cu e stranhero cu cinco maleta y mas bulto ta pasa sin ningun control. Cu esey nos no ta bisa cu e ciudadano di Aruba mester por pasa sin control, pero ta bay hopi leu ora cu e ta e unico cu ta haya control. Den e dianan aki nos a scucha y lesa di advertencia dirigi na nos, pa nos tene debido cuenta cu ta 400 florin na mercancia nobo so nos por importa sin paga impuesto, ora nos bolbe di vacacion den exterior. Bunita, cobra nos, pero cuminsa atende e asuntonan aki tambe.

Y den esey nos no kier tende cu pa tal o cual motibo legal nan no por actua… Laga nos duna un ehemplo: un stranhero cu no tin residencia na Aruba ta importa asina hopi mercancia, cu nunca por ta pa su mes uzo. Si ta par di siman e ta bin como turista, kico e ta bay haci cu tur e bultonan ey? Si no tin manera pa para e persona ey mes, lo no ta asina facil pa intercepta e persona despues tampoco. Ta bunita pa bisa cu departamento di Asunto Economico ta bay colabora den esaki, pero nan tin e personal adecua pa haci esaki? Nos no conoce e departamento otro sino como totalmente descuida pa gobierno, unda na final ta un persona so a keda cu ta encarga cu ‘opsporing’ y tin tur facultad y habilidad pa actua como inspeccion di asunto economico. Si e ministro nobo a cuminsa riba un rumbo nobo, contrario na e desastre di su antecesornan di mesun color politico, ta na su luga pa duna su persona e beneficio di duda. Pero no por ta asina cu despues nos ta tende cu ora e inspector ta na Barcadera, nan ta drenta mercancia na aeropuerto.

Seguidamente ta bin e problema di colaboracion di empresanan local. Ora un comerciante di exterior no por drenta mas cu su mercancia, anto e ta bay busca un persona local, cu un compania, of nan ta bay Camara di Comercio y ta lanta un ‘eenmanszaak’ di e persona local, registrando e persona di exterior of otro paisano como gerente, pa por trece e mercancia aki. Kico mester sucede ora cu nan cuminsa opera asina? Haci loke mester haci, y esey ta basicamente intercambio rapido di informacion y adapta ley si ta necesario.

Banda di tur esaki, mester di un control estricto di comercio riba caya. Pa esey nos tin ley cu ta regula comercio riba caya. Basicamente mester di un permiso, bao di Algemene Politie Verordening (art. 15, inciso 1 d). Aki tin tarea pa polis y ministro encarga cu obra publico pa vigila esaki. Aki ta unda ciudadano mes por yuda tambe, ora nan ta nota cu tin stranhero ta pasa di porta pa porta cu mercancia, of ta para banda di caminda cu mercancia.
Un capitulo special ta e benta di gasolin y diesel cu ta bin di Venezuela. Disculpa nos cu aki tin un par di cos cu nos no ta comprende bon. Ta cu boto nan ta busca gasolin, of no? Unda e boto ta mara, no na Boca Mahos, asina leu cu nos sa… Con dificil e ta pa intercepta boto cu ta bay varios biaha pa dia Venezuela; aya tambe nan ta viola ley, pasobra e benta di combustibel na Venezuela pa exportacion, ta estrictamente prohibi. Nos no por busca miho cooperacion cu autoridadnan aya? Si nos ta coopera cu e banda mafioso Chavista cu a podera di PDVSA, pa habri e refineria,pakico no coopera cu autoridadnan hudicial? Nos ta supone cu no ta tur polis ta corumpi na Venezuela, y cu sigur nan tambe lo kier pone un stop na e exportacion ilegal aki, cu ta costando e pais hopi placa. Actualmente Venezuela ta importando gasolin y diesel na prijs di mercado, y ta bira duna esaki regala na nan ciudadanonan, y un parti ta disparce via frontera (Colombia, Brasil), pero tambe via Aruba. Por ta cu aki tambe lo resulta cu deseo di actua ta uno, y realisa esaki ta otro, pero sin duda algun sumamente necesario. Nos ta pendiente.