Sociaal Psychiatrische Dienst (SPD) ta trata actualmente rond 330 pashent cronico cu ta sufri di salud mental. Hefe di e departamento ta conta cu nan personal tin hopi capacidad pa trata cu e problemanan relaciona cu cuido mental, sin embargo nan ta draai cu menos di mita di personal cu nan mester realmente.
E hefe Rafael Lopez tin 24 aña den e departamento aki y 31 aña den general practicando psikiatria. SPD tin dos categoria di persona cu nan ta trata: cronico y personanan cu ta sufri di problemanan pa un periodo mas cortico. Pashent cronico tin rond 330 cual ta fiho te ora cu un ta fayece, biba un otro caminda of pa otro tratamento. Den un aña nan por haya 150 pa 250 cu ta bin pa un tratamento mas cortico, segun sr. Lopez.
Seccionnan ta cera pa falta di personal
Manera nos tin algun siman caba ta informa, fundacion Geestelijk Gezondheidszorg ta den proceso di desaroyo pa integra psikiatria den su totalidad.
E ta un fundacion cu tin hopi aña den desaroyo. Segun sr. Lopez, pa motibo di esaki, desaroyo di SPD a bay un poco atras den hopi parti wardando e fundacion bin. E personal cu nan tin actual ta hopi educa y capacita pa haci e trabao aki, pero nan ta draai awor cu menos cu mita di personal cu nan realmente mester. “Esey ta pone tambe cu cierto seccion di nos departamento a cay afo. Nos seccion di informacion y prevencion a cera. Seccion di terapia den grupo lo cera. Nos seccion di crisis nos kier purba want’e, pero hopi biaha tin situacionnan ta sali for di man cu nos mester dos of tres personal pa atende cu e situacion. Pa e situacion cu nos ta aden tin ora nos ta hacie cu un solo persona, cual no ta e miho manera of mas sigur. Pero nos tin cu draai cu loke nos tin.”
Edificio neglisha
Sr. Lopez ta remarca cu te ainda e personal ta traha cu hopi smaak y door cu nan tin un capacidad di funcionamento/profesionalismo hopi halto, ta pone cu e departamento ta draai bon ainda. Y mas importante cu nan por a mantene nan capacidad di pashent te aworaki cu no mester nenga cierto pashentnan pa cuido segun sr. Lopez.
Bon Dia Aruba a tuma nota cu e edificio di e departamento aki ta mustra poco neglisha; no tin un borchi cu nomber di e departamento por ehempel, a print logo riba papel y pega esaki na algun di e bentananan. E integracion di psikiatranan di PAAZ cu SPD no ta cla ainda anto di banda di SPD, no ta sigur cu e empleadonan lo bay over, pero mas tanto e servicio. Lo cuminsa cu PAAZ prome y despues pasa pa servicionan di SPD pues ainda no ta mucho cla con lihe of con cos ta bay cana.
Menos pashent den temporada di eleccion
Sr. Lopez ta conta nos cu pa luna pues tin e 330 pashent cronico cu mester wordo trata tin ora tres pa cuater biaha den un luna. Tin otronan cu nan mester trata te cu dies biaha den un luna. Pa esunnan cu ta keda pa un periodo mas chikito, den siman nan mester wak pa nan practicamente tur dia. “E ta pone cu e cifra ta varia. Den un luna nos ta trata mil caso y otro luna un poco mas. Tin temporada cu ningun hende no ta meld. Pa straño cu e ta zona, temporada di eleccion practicamente ningun hende ta meld. Den temporadanan manera Pasco of aña nobo tambe cual hopi hende ta den un fase di alegria hopi biaha mi ta kere cu ta pone cu hopi hendenan ta sinti nan mes mas stabiel.
8 pa 12% interna
Durante e 46 aña cu SPD ta existi, nan ta trata tur locual ta pashentnan ambulatorio, esunnan cu no ta interna. Bo por haya un persona cu ta bira malo via dokter di cas, Departamento di Asuntonan Social, polis of Voogdijraad pa yega cerca SPD. Den caso cu e por wordo trata na cas mes, e pashent ta keda cas e ora pasobra esaki ta e meta segun sr. Lopez. “Di 330 hende cu nos tin, pa 250 hende cu ta bin, nos no por manda tur pa opname.”
E ta sigui bisa nos cu PAAZ tin un capacidad di 20 cama pa opname y tin cu haci tur esfuerso pa por trata na cas mes. Den casonan mas extremo cu no por mantene na cas pa motibo di peliger, ta manda e pashent PAAZ. Pero ta keda na huicio di personal di PAAZ pa interna pasobra SPD ta un instancia separa cu ta solamente recomenda pa interna e pashent si ta necesario.
“Hopi biaha na momento cu nan sali bek, nos ta haya nan bek. Den nos pashentnan, e por varia di 8 pa 12% di nos casonan ta wordo interna den un aña. E resto di 90% no ta ni wak of a yega PAAZ nunca.”
Acudi na tempo
E psikiatra ta conta nos cu esunnan cu ta bin pa ayudo cu no ta cronico (entre e 150 pa 250 pa aña), mayoria di nan ta recupera. Y algun di nan ta pasa pa bira pashentnan cronico. E oportunidad pa recupera ta bira hopi mas halto si un pashent acudi na tempo segun sr. Lopez. “Mescos cancer. Si den su prome fase bo a cuminsa tratamento bo ta cura. Pero si bo ta bay busca tratamento ora cu e ta na un fase cuater of final, e ta dificil.”
E ta bisa nos cu hopi biaha e fase ta cuminsa na momento cu bo ta jong. Bo capacidad pa recupera ta hopi mas miho anto bo ta hopi mas fuerte. “Si bo ta bira malo cu un 17, 18, 19 aña anto famia ta keda sconde e problema, cu ta droga of stress etc. cada biaha e por haya un recaida, e fase di recuperacion ta bira menos bon. Pa ora realmente kier bin den un bon tratamento, ya bo tin cinco pa seis recaida tras di lomba. Anto bo no ta logra alcansa e persona na e nivel cu nan tabata ta prome cu nan a bira malo.”
