Parlamento a aproba recientemente un pakete di ley entre nan un tin un impacto positivo den cuadro di salvaguardia, conserva y protege nos edificionan monumental, segun Oficina di Monumento Aruba. Ta trata di un ley cu ta otorga un vrijstelling (excepcion) di impuesto di traspaso na momento cu un ciudadano cu ta traspasa of cumpra un monumento.
Segun directora di Oficina di Monumento Aruba, Yvonne Webb-Kock, e aprobacion di e ley aki ta uno importante y valioso. E ta consider’e como e prome paso pa sigui protege nos monumentonan. E oficina aki tabata tras di e ley aki; ya cu un par di añanan pasa nan a haci un proposicion na gobierno pa stimula e hendenan cu ta inverti den monumento pa haci nan estimulo pa atractivo pa inverti. Ta bon sabi cu monumento ta edificionan cu no ta facil pa traha cu ne, ‘ya cu e ta e grado mas dificil den mundo di construccion’.
E ta splica cu ora bo tin bo cas normal no monumental, bo por deduci tur loke bo ta inverti den mantencion alrededor di un suma di 10 mil florin di bo belasting. P’esey –segun sra. Webb-Kock- nan a propone pa monumentonan proteha por haya tambe un deduccion di e gastonan cu e persona ta haci di mantencion na dje. Nan a propone pa e persona por deduci 5 mil florin pa concepto di mantencion pa aña. “Esaki ta un stimulacion hopi grandi y pa motibo cu Conseho di Minister ta para full tras di e proposicion aki y tambe mi a compronde cu unanimamente esaki a pasa parlamento, esey ta mustra tambe cu e ta bira importante pa bay protege nos monumento.”
E ta haci enfasis cu e edificio mester ta uno oficialmente proteha. Pa tal motibo Oficina di Monumento Aruba lo manda un lista pa departamento di Impuesto cu a yuda pa prepara e concepto di ley aki hunto cu e departamento Huridico. Actualmente tin alrededor di 36 edificio riba di e lista monumento protegi y cada aña cu e lista ta wordo actualisa nan ta mand’e pa departamento di Impuesto; pa nan sa cual ta esun proteha y cu nan por deduci e impuesto aki. Igualmente nan ta trahando riba e preparacion di 32 monumento mas cu lo wordo inclui den e lista aki. Nan ta edificionan cu ta den propiedad di particularnan.
Asina aki e doño di edificio monumental no mester bay na Oficina di Monumento Aruba, sino cu nan por bay directamente na departamento di Impuesto. “Pero e condicion ta cu e mester ta un monumento proteha”, segun sra. Webb-Kock. E ta laga sa cu nan t’ey ainda pa edificio particular ta wordo proteha; pero e sa cu gobierno tin intencion pa mas pronto cuminsa cu esaki.
E di dos aspecto di e ley aki cu el a trece dilanti tin di haber cu e impuesto di transpaso (overdrachtsbelasting) , kiermen ora cu bo cumpra un propiedad normal bo tin cu paga alrededor di 6% na belasting ora cu bo ta cumpra un edificio. Den caso di monumento Oficina di Monumento Aruba a propone pa esaki bira cero (0), locual a keda aproba.
