Alcohol ta aumenta e posibilidad pa haya cancer di pecho

Recientemente Wereld Kanker Onderzoeks Fonds (WKOF) a haci un investigacion, cu ta prueba cu hasta un glas di alcohol pa dia por aumenta e posibilidad pa haya cancer di pecho. A pesar cu ningun estilo di bida por garantisa cu bo lo no haya cancer, investigacionnan ta mustra cu 2 di cada 5 caso di cancer di pecho por a wordo preveni door di no bebe alcohol, haci mas movecion y mantene un peso saludabel.

E investigacion a confirma tambe cu sobrepeso y obesitas ta aumenta e posibilidad pa haya cancer di pecho despues di menopausa, cual ta e cancer di pecho cu mas frecuencia cerca muhenan. Sobrepeso y obesitas ta aumenta e posibilidad riba 10 otro tipo di cancer tambe manera entre otro cancer di tripa, cancer di pancreas y cancer di higra.

Resultadonan di un rapport recien cu WKOF na Hulanda a publica ta mustra cu tin prueba cientifico fuerte ta indica cu hasta consumo di un (1) glas di alcohol pa dia, manera un glas di biña of cerbes, ta aumenta e risico riba cancer di pecho, tanto prome como despues di menopausa. E rapport ta mustra cu movecion fisico tambe por minimalisa e posibilidad pa haya cancer di pecho. Den casonan di cancer di pecho prome cu menopausa drenta, ta trata aki di movecion fisico intenso manera landamento y coremento. 

Cancer di pecho ta e forma di cancer cu mas ta wordo diagnostica cerca muhenan. Segun e Nederlandse Kankerregistratie, na aña 2016 so ya como 14 mil hende muhe a wordo diagnostica cu cancer di pecho y tur aña como 3 mil hende muhe ta fayece aki na Aruba cancer di pecho ta aparece den e top 3 di cancer cerca hende muhe.

Pa minimalisa e posibilidad pa haya cancer WKOF ta conseha pa no bebe hopi alcohol of no bebe alcohol mes y tambe ta conseha pa haci hopi movecion fisico y come mas saludabel.

E resultadonan den e rapport di WKOF ta basa riba 119 estudio di diferente pais rond mundo. A studia como 12 miyon hende muhe pa yega na e resultadonan den e rapport. Di e 12 miyon hende muhenan aki 260mil a wordo diagnostica cu cancer di pecho. E analisis cientifico aki ta esun di mas grandi cu a wordo haci pa WKOF.