Diasabra ultimo e hoben ekipo di Bubali SC, ta logra corona un tremendo temporada di futbol, ora cu den e gran final di division Mayor di campeonato di Lifida bou supervision di AVB, e ekipo ta derota Estrella cu anotacion di 2-0.

E ekipo cu ta bou direccion di e entrenado  Dolfito Jacobs, cu asistencia di Antonio Lopez y Ruben Escalona, a bin ta trahando for di luna di Augustus 2016 pa e gran ocasion aki, cu sin duda a bira un logro grandi, c’un grupo di hungadonan cu a traha duro pa  casi un aña largo.

Bubali a logra di clasifica pa e serie semi final cu a ser hunga entre e prome cuater teamnan  y e ekipo a  logra clasifica na di cuater luga.

Sinembargo na momento cu e serie semi final a inicia, e ekipo di Bubali a duna su prome gran mensahe superando RCA cu anotacion di 1-0 y for di e momento ey e muchanan di Dolfito a bira mas motiva y a sigui hunga e serie aki sin derota y asina a clasifica pa e gran final di diasabra ultimo.

Cu sosten di un fanaticada cu practicamente a yena un parti di stadion Guillermo Prospero Trinidad, percurando pa un ambiente tremendo, e muchanan di Bubali a hunga un prome tempo contra di Estrella totalmente concentra caminda ambos ekipo a busca e atake pa asina habri e marcado pero den e prome periodo aki e gol no a cay.

Den di dos tempo Bubali a sigui persisti y   ta tuma bentaha den e partido ora cu e ekipo logra haya un penalty cu a wordo cobra pa Shaun Pietersz  kende a pone Bubali ariba 1-0.

Despues di e gol aki tanto Estrella como Bubali a sigui traha duro en busca di gol y tabata e hoben Jose Tobar di Bubali, un hoben cu semper ta hunga cu curason grandi, ta logra di supera portero di Estrella pa asina anota e 2-0 cu practicamente a sigura e titulo di campeon di e muchanan di Bubali.

Na momento cu referee a pita pa e final e alegria tabata inmenso di parti di e hungadonan y dirigentenan di Bubali, cu despues di hopi tempo, ta logra un titulo di campeon den un di e divisionnan hubenil di Aruba.

Cuerpo tecnico di e ekipo di Bubali, dirigi pa Dolfito Jacobs, ta  haci uzo di e oportunidad aki pa gradici tur hende cu a duna un man na e preparacion y weganan durante di e campeonato pero sigur pa tur esunnan cu tur ora tabata cla pa duna un man, entre otro Swinda Tromp, Elvis Tromp, Chai y Chino Tromp, Tico y Nilca Tromp,  Sohan Thode, Chan, Francis Angela, Josy, Aimee Saladin y tur fanatico,  entre nan  mayornan cu tur wega e bin presencia e wega di e muchanan durante di henter campeonato.

Trahando hunto semper ta guia na triunfo y Bubali division Mayor ta ehempel di esaki.