Republica Dominicana tin un gran espirito di hermandad

Diasabra mainta, Consul Dominicano na Aruba, Sra. Joselyne Rosario de Rosa a gradici tur esnan presente durante e ceremonia protocolar pa conmemora e di 172 aniversario di independencia di su pais.

El a destaca e balor historico di tur heroe di nan independencia cu a logra cu awe nan ta un pais liber y soberano. Pero particularmente nan tin un “gran espirito di hermandad”, segun Consul Dominicano.

E diplomatico a destaca e rol cu su pais ta hungando riba plataforma internacionalmente y regional. El a bisa cu e aña aki cu nan ta celebra nan 172 aniversario di independencia y 200 aña di e natalicio di e heroe patriotico, Matias Ramon Mella, presidente Lic. Danilo Medina a wordo eligi presidente temporal di Cumbre di Comunidad di Estadonan Latino Americano  y Caribeño (CELAC) na Quito, Ecuador. 

Sra. Rosario de Rosa a bisa cu su pais ta forma parti importante di e concierto di nacionnan cu ta comparti cu nan e mesun principionan y balornan di democracia, igualdad, libertad, paz y auto determinacion.

Igualmente el a laga sa cu nan ta dilanti di desafionan grandi y oportunidadnan. El a bisa cu e pueblo Dominicano a avansa sorprendentemente durante e ultimo 4 decada na nivel di progreso y modernisacion.