Segun informacion di Ministerio Publico, dialuna 3 di juli Afpak Team di Aruba a confisca dos suma bastante grandi di placa. Den haf di Baradera a confisca un suma di mas cu 14.000 dollar durante un accion di control di Aduana contra arma y droga. Durante e control aki, OM ta informa cu dos triplante di un barco a wordo listra. Nan no a haci aangifte na Aduana di e placa cu nan tabata tin cu nan, y segun OM nan no tabata di bay haci esaki tampoco. Den cooperacion estrecho cu KPA y Aduana, e suma di placa a wordo confisca bao guia di Ministerio Publico. Ambos tripulante a wordo deteni, como tambe e capitan di e barco. Nan ta wordo sospecha di labamento di placa. E investigacion ta continua.
Persona ilegal
Den e di dos caso, un sospechoso a wordo deteni via di un buracheria den publico. Ora cu el a wordo listra, a topa cu 6.500 florin y 4.895 dollar. E sospechoso tabata ilegalmente riba nos isla. Tin varios sospechoso contra di dje segun OM, y ademas e no por a duna ningun splicacion concreto y verificabel tampoco tocante di unda e placa a bin. El a distancia su mes merora for di e placa cu a wordo confisca cerca dje.
Afpak Team
E Afpak Team ta un cooperacion di Ministerio Publico, Cuerpo Policial di Aruba, Aduana, FIOT (Fiscale inlichtingen -enopsporinsteam) di DIMP (Departamento di Impuesto), FIOD (Fiscale Inlichtingen en Opsporingsdienst), KMar (Koningklijke Marechaussee, Kustwacht di Aruba, MOT (Meldpunt Ongebruikelijke Transacties) y RST. E Afpak Team ta ocupa su mes cu combati criminalidad financiero economico. Si bo persona por sa di señalnan di labamento di placa, bo por acerca Afpak Team via email na afpakteam@kparuba.com of via tiplijn na 11141.
