Tin algun cell sites di Mio cu ta na diferente parti di e isla, te hasta den cura di hende, cu ta den proceso pa desconexion. Esaki ta bin despues cu manera nos a trece pa dilanti caba, Mio a perde su licencia pa no cumpli cu su pagonan atrasa.

Mio ta keda responsabel pa desmantelacion di e Cell sites cu ta brinda conexion di internet/mobil. Proceso di desconexion di Mio a wordo inicia dia prome di juli manera cu nos a publica caba siman pasa. Esaki no ta pasa mesora pasobra no ta djis un switch cu bo ta kita anto baha e señal. Mester bay diferente ‘cell sites’ y desconecta nan un pa un. Obviamente Mio mester cooperacion cu esaki, pa cual a yega na palabracionnan cu tecniconan y DTZ, cu e proceso lo mester tuma luga den e proximo siman cu ta sigui. “Cualkier dia extra despues di prome di juli no ta un extension pero e ta pa DTZ haci e trabao corectamente. ” Minister Arends ta sigui bisa: “Nos crecemento economico ta depende di inversionnan externo cu ta drenta. Obviamente a sosode cu nan no por a keda mas Aruba y esaki mester awo sosode den un manera debido. Pa duna e clientenan tambe e oportunidad pa haci areglo di cambia proveedor.”

Cambio di proveedor
Segun minister Arends e clientenan por cambia di proveedor aworaki tanten cu e señal ta den aire. Bon Dia tin varios dia purbando di tuma contacto cu DTZ y no a logra haya un reaccion riba e aspecto tecnico ainda. Gobierno a haci un apelacion na Mio pa comunica e cambionan aki cu nan clientenan como tambe empleadonan. Sr. Arends: “Ta un situacion tiki fastioso cu nan mester tende for di gobierno kico ta pasando, cual mi no ta haya ta totalmente na su luga. Obviamente mi tin e obligacion ey pa duna e informacion cu mi por duna y di documentonan cu a bay corte.”

Debenan atrasa
Na maart 2017 a efectua un decreto caminda cu ta duna Mio un periodo pa opera e licencia te cu prome di juli pa cumpli cu debenan atrasa. Esaki a bira un suma di 15 miyon florin cu ta consisti entre otro di sumanan periodico cu mester paga pa loke ta trata e concesion cu a wordo duna den aña 2004 pa 2014. Como tambe e suma cu ta wordo paga cada 10 aña pa e concesion nobo cu a cuminsa y drenta na vigor na 2014, hunto cu e sumanan periodico for di 2014 te cu aworaki ta haci total un suma di 15 miyon florin. (Licencia di 7.2 miyon, y 1.5 miyon pa paga pa aña) Sr. Arends: “Nos no a logra for di aña 2012 caba, for di ministerio di asuntonan di comunicacion y departamento di telecomunicacion pa purba yega na un solucion pa e sumanan habri aki. Pafo di corte como tambe pa den di corte.” Esaki no a resulta pues gobierno a keda obliga pa efectua e decreto aki y hala aden e licencia di Mio.

Estudio di 10 aña atras
Esaki no ta algo usual pa gobierno ni pa minister di asuntonan economico unda cu bo ta kita derecho di existencia for di un compania di telecomunicacion, segun minister Arends ta bisa. “Pero gobierno t’ey tambe pa garantisa un ‘level playing field.’ Si e suma ta halto si of no, si tin tiki usuario si of no, e sumanan ta stipula pa ley y esey ta e gastonan pa loke ta trata uzo di red di telefon mobil.” E sumanan aki como tambe cantidad di proveedor cu ta existi ta a base di un estudio haci casi dies aña pasa segun e mandatario. Un discusion cu ta bin dilanti atrobe: cuanto compania di telecomunicacion mobil e mercado local por wanta? Na 2003 a pensa cu tres lo ta bon. Curaçao tambe awo a bay bek na dos compania. “Esey ta estudionan cu expertonan y tecniconan lo mester haci pafo di gobierno y DTZ pa haci un evaluacion mas obhetivo di esaki,” minister Arends ta laga sa.

Mio
“Esaki ta un dia tristo y dificil, pero nos ta laga boso cu nos miho deseonan y sincero gratitud.” Mio a pone riba nan pagina di Facebook cu e suma di 15 miyon florin cu nan mester paga, ta hopi mas cu e placa cu Mio ta colecta den Top Ups riba un basis anual. Esaki segun nan no ta inclui otro cosnan manera salario di empleadonan, renta di Cell Site/costonan di reparacion, y sumanan paga pa luna na Setar pa uza e unico ‘off island’ conexion di cable internet. Mio ta laga sa cu ora di mira e gastonan aki, Mio semper tabata un compania cu a ‘break even’ financieramente; solamente concentrando den brinda internet riba un costo baho, y servicionan na Aruba cu ta desea e competencia. Nan ta comenta cu: “Manera cu nos a haya e aprobacion final na nos oficina principal via Bailiff, nos no tabata tin ningun otro opcion pa completamente cumpli cu esaki. Y spera un bishita di e director pa planifica un transicion di maneho apropia. ” Nan ta laga sa cu ta nan responsabilidad pa sigura cu nan clientenan y partner ta wordo bon trata durante e proceso aki. Pa asina ningun hende keda sin servicio durante un tempo di emergencia, anto e economia di negoshi di Mio no ta interumpi.