Cuerpo di Aduana a bin cu un serie di recomendacion mirando e temporada aki di vakantie, caminda hopi di nos  hendenan ta probecha pa y trece cierto articulonan di afo; of nan ta ricibi famia y hendenan di afo. Ayera mainta durante un conferencia di prensa, vocero di Duana, Marilyn Orman-Wout, hunto cu Ronny Croes di e seccion di Duana-Aeropuerto a bin cu diferente recomendacion den cuadro di conscientisa nos biaheronan local cu ta preparando pa bay cu vakantie afo.

Control na aeropuerto
Sr. Croes a bisa cu nan ta scan tur hende tanto turista como local haciendo uzo di dos scanner mashin nobo na aeropuerto. Mientras cu e otro dos cu nan tabatin prome a bay otro seccion. No tin excepcion pa asina no tin “discriminacion”, el a bisa. Aunke tur hende practicamente mester pasa door di control di scanner e fluho ta bay lihe. Segun sr. Croes un hende pa para menos cu 20 minuut ya cu e proceso aki ta bay hopi lihe. Ora cu tin hopi drukmento di pasahero nan ta habri e posibilidad di pasa; pero normalmente tur ekipahe mester pasa door di scan. Durante e dos ultimo lunanan, nan ta ripara cu mayoria di bebida ta bin di e turista Mericano. “Esey gobierno kier laga bay. Kiermen nos ta trahando riba e parti di invoerrechten.” Nan tin derecho na dos boter pero algun di nan ta bin carga. Ora cu personal di Duana ta mira cu ta di mas, e ora nan tin cu paga. Igualmente nan no ta spaar riba e pregunta: bo tin algo cu declara? Aunke e persona por bisa cu e no tin nada, esaki no ta un excepcion of excuus pa e no wordo controla. Tin caso cu ora nan ta haya cu pa ehempel cantidad di paki di sigaria ta wordo treci camufla, nan ta yama fiscal. E motibo di esaki ta cu e persona a gaña of tabatin e intencion di no paga; y nan ta castig’e cu un boet. E boet ta core entre 800 florin pa cada 5 carton bay ariba.

 

Placa y papel balor
Igualmente den cuadro di ley di MOT pa evita labamento di placa, Duana ta controla e hendenan cu ta purba drenta of sali cu un cantidad considerabel di placa. Sr. Croes a bisa cu tur persona ta obliga di declara si e ta biahando cu un suma cash of papel balor superior na 20 mil florin for di Aruba; of si e ta yegando bek. E notificacion aki ta wordo haci na e locker di Departamento di Aduana na aeropuerto mediante un formulario di MOT, hasta si e no ta e doño di e placa of documentonan di balor. Si un persona transporta placa of documentonan na un balor di mas cu 20 mil florin y no haci un notificacion of haci un notificacion incorecto por core e riesgo di haya un castigo di prizon y un boet, banda di esaki Departamento di Aduana lo confisca e suma aki.

Excepcion
Otro recomendacion cu cuerpo di Aduana a haci pa esnan cu ta biahando ta lo siguiente: Na momento cu biaha cu articulonan di balor manera laptop, celular, tablet, ekipo di deporte, etc., lo mester registra esakinan na oficina di Aduana na aeropuerto. Esaki pa evita cu mester paga impuesto na momento cu yega Aruba bek.
Tambe tin cierto excepcion di impuesto cu e biahero tin derecho na dje. Ta asina cu na momento cu e persona local of un turista yega Aruba, e tin derecho riba su ekipahe personal y banda di dje exoneracion di impuesto  (vrijstelling) riba articulonan personal nobo te na un balor di 400 florin; si e productonan aki no ta destina pa comercio.
Si e persona tin productonan na un balor di mas cu 400 florin e lo tin di paga impuesto riba e diferencia aki. Personanan cu tin derecho riba e exoneracion di impuesto y accijns mester tin 16 aña bay ariba.
Algun producto por wordo importa, pero mester tene cuenta cu un cierto cantidad so por wordo importa liber di impuesto. Si un persona trece mas cu e cantidad indica e lo tin di paga impuesto y/of accijns riba e diferencia. Un di e rekisitonan pa por bin na remarca di exoneracion di impuesto ta cu e persona mester ta mayor di edad y mester ta den posesion di un ticket di biahe. Departamento di Aduana ta recomenda tur biahero pa warda tur factura pa asina por tin tur e balor di tur producto na man, pa asina nan por haci un cobransa husto. Si acaso e biahero no tin factura, Aduana lo busca informacion online sin tene cuenta cu e biahero lo por a cumpra e producto cu descuento.