Minister di Husticia Arthur Dowers a propone pa bin cu e ley di combati molester (bestrijding overlast). Asina e kier duna polis mas poder pa combati molester manera esunnan crea door di gang, adicto y bendedonan di droga, e ta bisa.
E instrumento di nos leynan penal ta complica y hopi biaha ta tuma hopi tempo pa por actua den algun caso specifico, segun e mandatario. “Den e ley aki ta crea podernan administrativo unda minister por tuma medidanan, por ehempel casnan cu ta causa hopi molester, cu por ehempel tin bendemento di droga den cantidad chikito, unda e instrumento penal no tur ora ta duna e resultado desea como cu e cantidad di droga ta tiki, unda caso no por duna castigo of sigur no castigo halto. Cu e ley aki, awo lo bay tin poder pa por ehempel laga cera e cas pa un periodo y si tin mester permanente.”
Areanan di riesgo
E ley aki ta crea e posibilidad pa anuncia areanan di risico pa siguridad, cual ta areanan cu ta conoci na unda tin hopi molester di gangnan, desordo, hortamento, vandalismo etc. y lo crea mas poder pa por controla. Lo bay bin cu e “gebiedsverbod” unda por prohibi personanan cu a comete cierto delitonan pa bay den un cierto area pa no causa problema eynan mas, segun e minister.
Mucha jong sin supervision
Tambe ta crea mas poder pa actua den caso cu tin eventonan grandi y unda ta stroba orden publico, creando molester pa por ehempel bisiñanan eybanda. Tambe a constata cu muchanan jong, hasta bou di 12 aña, cu ta riba caya te laat sin supervision di mayor, sa crea molester pa e bisindario. Lo bay bin cu instrumentonan pa por actua, unda mayornan por haya un orden pa nan yiu, cu mester ta bou di supervision di mayor.
E ley aki ta un di varios leynan cu e minister a bin cu ne pa por sigui combati criminalidad y pa garantisa siguridad na Aruba. Por pensa tambe riba cambio di e Politieverordening, introduciendo e supervision cu camara (cameratoezicht0 na Aruba y e cambio haci den Landsverordening verdovende middelen creando mas posibilidad pa controla personanan den forma preventivo tambe riba posicion di droga. Den e cambio di Vuurwapenverordening a crea mas posibilidad pa controla den forma preventivo riba posesion di arma. Asina e mandatario ta informa.
Preocupacion pa mucho poder
Conseho di Consulta (Raad van Advies) a entrega su conseho riba e ley aki. Den e conseho aki a mustra nan preocupacion pa cu cierto podernan y instrumentonan nobo introduci cu den nan bista ta mucho estrecho, asina minister Dowers ta bisa. Bon Dia Aruba te awor no a mira e conseho aki y lo haci un esfuerso pa ricibi e documento aki. Ministerio di Husticia lo contesta preguntanan di e Conseho y lo duna splicacion mas amplio riba e necesidad pa cu e podernan nobo aki, cu segun e minister, ‘sin duda lo ta na beneficio di mas siguridad na Aruba’.
