Siman pasa parlamento a aproba unanimamente e ley cu ta duna Banco Central di Aruba mas poder pa supervisa institutonan of companianan cu ta transferi placa pa exterior y cu ta cambia placa di valuta.
“Nos a amplia e definicionan den e ley pa asina Banco Central tin un miho supervision riba e desaroyonan aki”, asina minister di Finansa, Angel Bermudez ta indica den un relato.
Segun e mandatario, e desaroyo cu ta tuma luga na Aruba unda cu turista of personanan no por haya valuta of dollars den nan mesun pais y consecuentemente nan ta ‘swipe’ aki na Aruba pa nan por conta cu placa of dollarnan cash, ta lo cual a duna inicio na e proposicion pa fortifica e supervision di Banco Central. Manera den comunidad ta yama raspa placa of raspa tarheta.
“Esaki basicamente ta un actividad bancario pero nos a ripara cu no ta na institutonan bancario nan tabata haci esaki si no na diferente negoshi den nos comercio”, segun e mandatario.
E ta sigui splica cu esaki ta trata di un salida di dollarnan, pues Banco Central como instituto encarga pa supervisa nos moneda y nos divisa mester tin e hermentnan necesario pa supervisa e desaroyonan aki manera debe ser. “Pa bo tin un registracion riba esaki, nos a bin cu e areglo aki cu ta duna nan mas posibilidad pa registra y supervisa un desaroyo asina.”
E companianan cu ta realisa e actividadnan aki como parti di nan negoshi mester ta registra na Banco Central y nan tin 6 luna pa haya e permiso indica pa realisa e actividadnan aki.
