Na februari 2015, un tata a acusa juffrouw Suki di ta bully su yiu. A base di e acusacion aki y e medidanan disciplinario cu minister di Enseñansa Michelle Hooyboer Winklaar kier a impone, juffrouw Suki a entama un caso contra minister di enseñansa. Ayera hues a dicta den e caso aki y relaciona cu e decision aki di hues, nos redaccion a ricibi e siguiente relato.

E relato ta conta e storia di e banda di juffrouw Suki. Bon Dia Aruba no a ricibi ainda e reaccion di minister di Enseñansa. Dialuna 3 juli hues a dicta den e caso cu juffrouw Suki a entama contra minister di Enseñansa, un caso cu a cuminsa dos aña y mey pasa. Despues di varios caso den corte, juffrouw Suki a gana su caso: e minister no tabata tin suficiente motibo pa persigui e juffrouw di e forma aki, y sigur no pa impone medidanan disciplinario cu e minister kier a impone.

E caso a cuminsa na februari 2015 na momento cu tata di un alumno di juffrouw Suki e bin scol pa reclama cu e juffrouw lo a ‘bully’ su yiu. A resulta cu e dia di e supuesto ‘bullying’, juffrouw Suki no tabata na scol mes. E incidente cu e tata a referi como ‘bullying’ a tuma luga den les di otro docente. E ‘misunderstanding’ aki a wordo aclarea mesora entre e tata, e cabesante di e scol y juffrouw Suki, hasta cu un ‘handshake’. Sinembargo despues a resulta cu e tata tabata bon amigo di e minister y e mandatario a dicidi cu e no ta laga e cos aki te eynan, y a cuminsa un persecucion cruel contra e juffrouw. “Sin haci un investigacion drechi, y sin importa cu ya e cabesante di e scol a atende cu e asunto, minister Hooyboer a manda carta di schorsing di 5 dia pa juffrouw Suki, cu instruccion pa dun’e otro trabou pa resto di e aña escolar y no permitie duna les mas, y obliga e juffrouw pa bay un training pa domina su mes via di su dokter di cas”, asina e relato ta bisa.

E juffrouw mesora a acudi na abogado di Simar, y a haya tur sosten di Simar. Na e momento ey e minister a cambia su postura. El a laga tur e castigonan cay, cu excepcion di e ultimo, y a keda para ariba cu e juffrouw mester pa bay un training pa domina su mes via di su dokter di cas. E abogado di Simar na e momento ey a trek in e caso, sin consulta cu e juffrouw y esey a pone cu e juffrouw a cambia di abogado y a acudi na buffet di abogado Croes Wever Ruiz. E escogencia di abogado Hendrik Croes, e abogado cu tin mas experiencia como abogado aki na Aruba, tabata motibo pa Simar retira su sosten tambe na e juffrouw, y e juffrouw y su coleganan tambe a retira como miembro di Simar. Sinembargo juffrouw Suki a haya hopi sosten di coleganan docente, famia y amigonan, y esey a pone cu el a dicidi di continua cu e lucha aki pa limpia su nomber.

“E escogencia di abogado Hendrik Croes a pone cu di e banda di e minister tambe cosnan a bira mas sushi. Tera Group, cu ta wordo paga cu placa di pueblo pa mercadeo di minister Michelle Hooyboer, a cuminsa un persecucion personal contra e juffrouw. Mas tristo di tur esaki ta cu e juffrouw no conoce ningun di e hendenan cu e minister a manda pa atac’e riba Facebook y riba 24ora.com. Juffrouw Suki a pasa dos aña y mey hopi dificil, pasobra e sa cu e no a haci nada, pero a wordo husga prome cu el a haya un oportunidad pa defende su mes.
Juffrouw Suki su fe ta grandi y e ta un persona di un curason bunita, cu no ta carga rencor y awe porfin por a celebra cu husticia a vence. Juffrouw Suki a sali liber di tur acusacion, minister Michelle Hooyboer su actonan y su cartanan tur a wordo destrui “vernietigd” pa hues, y pues e persecucion politico di minister Michelle Hooyboer a wordo rechasa. E minister awor mester paga e gastonan di abogado di e juffrouw, te na un suma di Afl. 2.000.”

Juffrouw Suki ta bisa cu e ta sumamente satisfecho cu husticia a vence, y cu su bon nomber a keda reestableci. E gastonan cu e minister mester pag’e bek no ta nada compara cu e gastonan real di abogado cu e juffrouw mester a haci, cual ta inhusto pasobra si no tabata pa e persecucion personal di e minister contra juffrouw Suki, e lo no a hay’e den tanto gasto. Juffrouw Suki lo evalua cu abogadonan si por cobra e minister tur e daño den un procedura separa.

Mientrastanto juffrouw Suki ta sumamente feliz, y awor si por sigui cu su bida normal y por sigui dedica na enseñanza di su muchanan di scol, cu alma y cuerpo, cara na laira manera semper el a haci. Juffrouw Suki ta gradici tur hende cu a tene den oracion y pensamento, cu a sostene cu a yud’e ora mas e tabata tin mester. Specialmente su alumnonan, mayornan, coleganan,famia y amigonan. “Mi lo no lubida loke boso a haci pa mi na momentonan mas dificil den mi bida.”