Diahuebs mainta pa 11:25 Cuerpo di Bombero a haya melding cu un candela a start den un warehouse di Crown na Balashi. Esaki a bin casi un siman despues cu Crown Motors na Turibana a kima por completo.
Diahuebs empladonan di Crown na Balashi a tuma nota cu un candela a start den e warehouse. Mesora centro di alarma a despacha unidadnan di bombero cu urgencia y polis pa e sitio. Na yegada di bombero a topa cu huma y a drenta accion, bay den e luga pa asina combati e candela pa e no expande bira mas grandi. Polis a notifica recherche pa presenta na e sitio pa haci investigacion. Ponson: “Danki Dios e luga aki tabata tin un fire alarm. E trahadonan di Crown mes a reacciona y mantene e candela chikito pa ora cu brandweer yega, a percura di mantene e schade na minimo den Crown.”
Di locual nos a compronde for di sr. Ponson, tabata tin un tipo di problema electrico cu a despues causa cu un matras a pega na candela.
Hopi candela ultimamente
Mas o menos dos siman atras tabata tin un candela cu a destrosa gran parti di un warehouse na dakota. E candela aki tabata hopi cerca di e warehouse di Crown na dakota unda cu el a afecta e warehouse banda di esun cu ta pertenece na Cas di Max. Den camara di siguridad a mira cu e candela aki a wordo cendi intencionalmente. Despues siman pasa tabata tin un candela grandi cu a start na Crown Motors Turibana. E candela aki a start pa medio di un accident cu un empleado a haya cu un tanki di gasolin. Poco dia atras tabata tin otro candela cu a destrui un cas na Sabana Basora Noord.
“Ta asina cu Cuerpo di Bombero ta bon getrained pa esaki y tin suficiente personal. Ora cu por ehempel cu e candela na Balashi, nos a percura pa tin hende na e post na Tanki Flip pa asina percura pa sigui brinda servicio si algo otro mester sosode riba mesun tempo,” sr. Ponson ta bisa.
