Dia 22 di september 2017 e pueblo di Aruba lo bay urna electoral pa scoge su gobierno pa e proximo 4 aña. Nos tur sa cu e situacion financiero di Aruba no ta cos pa gaba. Aruba conoce un tradicion den politica pa aña nan largo. For di prome cu Status Aparte te cu e dia di awe nos no a mira un cambio den politica. E palabra politica no tin nada malo cu ne pero hende ta haci cu e palabra a perde no solamente su origen pero tambe su contenido. Den decadanan di gobernacion placa di pueblo ta wordo uza pa cumpra voto pa asina nan por regresa den gobierno.
Ora eleccion ta cerca bo ta mira hopi movecion pa asina e wowo di pueblo por wordo ciega. Yen di proyecto riba otro pa asina mira cu ta traha pa pueblo. Ora eleccion pasa ta baha speed atrobe. Ora pueblo tin un mal gobierno e pueblo ta sufri pero ora pueblo haya un bon gobierno e pueblo lo tin paz y lo tin goso. Hopi promesa falso ta wordo duna e.o. trabao, tereno ect. Pueblo di Aruba ta tempo pa nos habri nos wowo y ban caba cu e politica tradicional. Den e ultimo 14 aña tin hopi promesa cu nunca a wordo cumpli. Campaña ta un cos y goberna ta un otro cos.
Na aña 2013 a bisa cu e edad di pensioen lo no wordo aumento pero despues di eleccion a core hisa edad te cu na 65 aña. Pakico? Esaki tabata pa falta di un gobierno cu no sa con pa maneha nos finansa publico. E placa destina e fondonan di pensioen tabata bay otro caminda en bes cu nan bay na e luga unda cu e mester ta. Falta ta wordo tira riba crisis mundial y un delaster cos. E pueblo ta esun cu tin cu biba cu e mal maneho di un mal gobernacion. Prome cu e placa yega den caha di gobierno ya e tabata tin un otro destino. Gobierno di Aruba no conoce kico ta spaar y no sa mes kico kiermen traha dam y warda e awa.
P’esey mes partido Curpa ta un partido cu ta consisti hendenan sincero cu ta pone Dios na prome luga. Nos si lo ta si y nos no lo ta no.
